O Equipo da Biblioteca xa está pensando no Día da Poesía e en como podedes dar renda solta a vosa creatividade. Sabemos que hai moito talento poético entre o noso alumnado, así que só tedes que animarvos a concursar.
luns, 2 de marzo de 2026
ROSALÍA EN RADIO CASTRO
No Día de Rosalía, Paula e Rocío -alumnas de Oratoria que forman parte do Equipo de Correspondentes- puxéronse ante os micros de "Non calamos. Radio Castro" para ler o manifesto da AELG escrito por Eva Veiga. Animámosvos a escoitar porque, como Rosalía, nós tampouco nos resignamos. "Con ela queremos loitar contra o patriarcado, contra a trata de seres humanos, contra o autoritarismo, contra todas as inxustizas e a prol dunha humanidade responsable que coida da infancia e da educación humanista, aberta ao outro, ao diferente, capaz de mostrar empatía e colaboración".
DÍA DE ROSALÍA
O Día de Rosalía conmemorouse cunha preciosa exposición. Normalización lingüística promoveu "Todas as Rosalías posibles" para que o alumnado desenvolvese a súa creatividade. Cadaquén viu a Rosalía dunha maneira diferente, como cadaquén sente a súa poesía. Esta exposición acompañouse cos libros de e sobre Rosalía que temos na Biblioteca.
martes, 24 de febreiro de 2026
AGASALLO POÉTICO
A nosa compañeira de equipo e profesora de Lingua galega, Noa Pérez ou Noa Setemuíños como se fai chamar, vén de agasallarnos co seu libro de poemas Pequeno panteón politeísta, gañador do Premio Rosalía de Castro de Poesía.
Grazas, Noa, por este agasallo e, parabéns polo premio e a publicación do libro😊
O ENTROIDO
Un ano máis, tivemos na biblioteca unha exposición de máscaras que mostraron a creatividade do noso alumnado. Esta é unha mostra das expostas. Parabéns!!!
xoves, 12 de febreiro de 2026
A RADIO
O 13 de febreiro é o Día Internacional da Radio; por iso, queremos fomentar este medio de comunicación e convidarvos a participar no Proxecto Documental Integrado deste curso "A radio como ferramenta educativa".
Ademais, desde "Radio Castro. Non calamos", a nosa radio, convocamos un concurso de podcast.
Esperamos que haxa moita participación!
luns, 9 de febreiro de 2026
MEMORIA DEMOCRÁTICA
A Biblioteca acolleu unha formación de Memoria democrática para o alumnado de 4º ESO, organizada polo Departamento de Historia. O obradoiro, impartido por Roi de Agareso, foi moi interesante e deulle a coñecer ao alumnado as vivenzas dalgunhas mulleres na época franquista. Unha delas foi Syra Alonso que nos Diarios relata a súa angustia nos días nos que o seu home foi detido polos franquistas e excutado. Ademais, puidemos recomendar este libro que forma parte da nosa biblioteca.
MICRO ALGAS
Reuniuse o Club de lectura para comentar Micro algas de Xulia Pisón. Despois de escoitar as opinións sobre este cómic e valorar a importancia destes microorganismos para a natureza e o ser humano, fíxose un cartaz para facer partícipe a todo o centro desta actividade.
Ao final da sesión, repartíronse os libros da seguinte lectura, Mentira de Caré Santos.
xoves, 5 de febreiro de 2026
BOMBARDEO!
Bombardeo! foi outra das propostas do departamento de Música na que o alumnado protestou polas guerras cunha acción poético-musical. Ademais do alumnado de Música, parte imprescindible neste proxecto, colaborou a Biblioteca, o equipo de Normalización Lingüística e o alumnado de Oratoria e Correspondentes.
MÚSICA POLA PAZ
O 30 de xaneiro a biblioteca participou en "Música pola Paz" unha iniciativa promovida polo departamento de Música. O coro, dirixido polo profesor Ismael, cantou na biblio We are the world.
Expuxemos fotografías cedidas polo xornalista Antonio Pampliega.
mércores, 28 de xaneiro de 2026
OBRADOIRO DE ILUSTRACIÓN
O alumnado de Debuxo artístico de 1º de bacharelato puxo a proba a súa creatividade para crear ilustracións a partir de varios personaxes e obxectos propostos por Julio. Ademais, entraron no mundo das sensacións; despois de escoitar sons ou de percibir determinados olores tiveron que facer un debuxo de aquilo que lles suxería.
Moitas grazas a Julio por aceptar a nosa invitación.
luns, 19 de xaneiro de 2026
CONCURSO DE MÁSCARAS
Un curso máis convocamos un concurso de máscaras para poñer a proba a vosa creatividade. Tedes dúas opcións:
- unha máscara dalgún personaxe malo, malísimo dun libro, película ou cadro
- unha máscara do personaxe que vos queirades; temática libre
Coma sempre haberá algún agasallo para as mellores máscaras. Animádevos a participar!
venres, 16 de xaneiro de 2026
PREMIOS "OS DOUS DE SEMPRE"
Poñemos fin ao Ano Castelao entregando os premios do concurso "Os dous de sempre". Parabéns a todo o alumnado participante, que deu mostra das súas aptitudes teatrais, e, especialmente, ás gañadoras e gañadores👏👏👏
Miguel, Alejandro, Manuel e Gabriel de 2º ESO C (1º premio)
Pablo, Alejandro, Pablo e Digno de 4º ESO C (1º premio)
Alumnado de 3º ESO (2º premio)
venres, 2 de xaneiro de 2026
UN BO NADAL CON LIBROS
O equipo da Biblioteca deséxavos Bo Nadal e moi boas lecturas para este tempo de lecer.
Lecturas para o Nadal de Biblioteca Castro Alobre
CON XURXO SOUTO
Marisa e Fernando do equipo da biblio estiveron na presentación do libro de Xurxo Souto, A novela do Bravú. Esperamos á volta, para que nola comenten e seguro que vai ser unha das novedades da nosa biblioteca.
CANCIÓNS DE NADAL
Mentres comentabamos 1984 tivemos unha sorpresa. O profe de Música, Isma, veu á Biblio co coro a cantarmos cancións de Nadal. Fixérono realmente ben e animáronos a xuntanza.
Parabéns!!
1984 NO NADAL
Última xuntanza do ano do Club de lectura de ciencia ficción. Fernando falounos de Orwell e fixo unha introdución ao libro, para situarmos no tema. Moi interesantes os seus comentarios.
Comentouse, máis ou menos, a metade do libro. Inquietante o Gran Irmán e a revisión do pasado. E tamén xurdiu a comparación desa vixianza constante coa nosa vida permanentemente exposta a través dos teléfonos móbiles e das redes sociais.
Resultou unha reunión interesante e deixounos con ganas de afrontar esa última parte do libro que nos queda para despois do Nadal.
