MATILDA

 Nova xuntanza do Club Curuxaina para falar de Matilda.

O PRIMEIRO PODCAST

Non calamos. Radio Castro xa ten o seu primeiro podcast. Como recordaredes, o Día da Radio inauguramos esta radio escolar entrevistando a Carlos Crespo. Aquí podedes escoitar esa entrevista.

DÍA DE ROSALÍA

 O día 23 de febreiro conmemórase o Día de Rosalía. Este día sairá á luz o documental dirixido pola profesora Marisa Moreda, Adeus vista dos meus ollos, porque "se Rosalía vivise no 2025 plasmaría coas súas letras as vivencias destas crianzas, e das súas familias, que cando "vén, vén como rosas" en busca dun futuro mellor".

En palabras da directora do documental, "Os discursos da rapazada protagonista, contados desde o eu máis íntimo, pretenden contrarrestrar os discursos de odio que, por veces, afloran nas aulas sobre a poboación migrante, fomentando a construción da empatía e o empoderamento comunitario.

Este traballo documental esperemos que vaia crecendo e alimentándose dos ollos  e das voces que o visualicen, desde as perspectivas particulares ata as colectivas, co fin de construírmos un discurso transformador e dialogante".

PARELLAS MITOLÓXICAS

 O alumnado de Grego e de 4º de Cultura clásica elaborou uns murais nos que Eros foi o protagonista. Nestas creacións non podía faltar Safo, a nosa poeta.

VEN LER Á BIBLIOTECA!

Xa temos a triloxía completa de Rebecca Yarros. Despois de Alas de sangre y Alas de hierro, se publicó Alas de ónix. Desfruta desta triloxía!

DÍA INTERNACIONAL DA MULLER E DA NENA NA CIENCIA

Para conmemorar o Día Internacional da Muller e da Nena na Ciencia, tivemos no noso centro a Marta Pérez Pereira, doctora da Universidade Autónoma de Madrid e investigadora da Cátedra Margarita Salas. Esta actividade foi promovida pola profesora do departamento de Lingua castelá Juliana Dios. A científica mantivo un interesante encontro co alumnado de 3º ESO para falarlle do cerebro.

Tamén, vos recomendamos lecturas para que non esquezades que hai e houbo moitas mulleres científicas. Podes atopalos na biblioteca.

DÍA INTERNACIONAL DA RADIO

 O 13 de febreiro, Día Internacional da Radio, inauguramos Non calamos, Radio Castro. Tomamos esta decisión despois de dous anos intentando poñela en práctica. Grazas ao esforzo da profe Marisa, coa axuda e asesoramento do profe Fernando e coa colaboración da Biblioteca, iniciamos un percorrido ao que esperamos que se vaia sumando máis profesorado para facer de Radio Castro, unha radio de todas e todos. Os nosos medios son aínda moi precarios, pero a ilusión e as ganas de sacar este proxecto adiante son moitas. Contamos xa cun equipazo de Correspondentes e cun grupiño de alumnado cunha pequena formación inicial en radio. Foi precisamente este alumnado o encargado de gravar o primeiro podcast, entrevistando a Carlos Crespo, o padriño de Radio Castro.

Podedes ver esta actividade no boletín de Correspondentes xuvenís, que publica a Dirección Xeral de Xuventude, clicando aquí.

Carlos Crespo fíxose eco no seu Instagram de Radio Castro.

PALESTINA

Estas son algunhas fotos do Obradoiro "Coñecendo Palestina" que acollemos hoxe na biblio.

RADIO CASTRO

Con motivo do Día da Radio, o xoves 13 de febreiro inauguraremos Non calamos. Radio Castro. Xa pasaron dous anos desde que o Equipo de Correspondentes, desde as aulas do Proxecto Competencial, organizaron o concurso para darlle nome, o concurso para elixir o logo, realizaron un curso de formación de 8 horas no Espazo Xoven cun xornalista, Carlos Crespo, ademais de practicar na aula.

Será este alumnado o que dará inicio ao primeiro Podcast da nosa radio que se gravará o día 13 na Biblio. Iniciaremos cunha entrevista a Carlos Crespo que amablemente aceptou ser o noso padriño.

MAKINARIA DE CARLOS NEGRO

O alumnado de 3º ESO estivo lendo Makinaria de Carlos Negro. O escritor mandoulles un vídeo para achegarlles a súa obra.

VEN XOGAR!

Xa temos novos xogos na Ludoteca!

DÍA DA ILUSTRACIÓN

 No Día da Ilustración queremos recomendar catro libros sobre animais, ilustrados por Pancho Lapeña, ben coñecido polo noso alumnado como profe de Filosofía e Valores. Seguro que moita rapazada levará unha sorpresa ao coñecer esta nova faceta de Pancho.

Podedes solicitar o préstamo destes libros na biblio.

LECTURAS PARA A PAZ

DÍA DA PAZ

Conmemoramos o Día da Paz e o Día Internacional contra o Uso de Menores Soldado para denunciar o recrutamento forzado de nenos e nenas nunha listaxe ben longa de países.

O alumnado de 3º PDC informouse sobre este tema na biblioteca e elaborou un mural, recomendando dous libros de Gervasio Sánchez, Salvar a los niños soldado e Vidas minadas, Diez años.

FINALISTAS "MÓVETE CO BIOETANOL"

 No mes de outubro o alumnado de 3º ESO tivo un encontro con Big Van Ciencia do que nos fixemos eco neste blog (https://bibliocastroalobre.blogspot.com/2024/10/big-van-ciencia.html). Helena e Oriol convidou ao alumnado a participar no concurso Móvete co Bioetanol e un grupiño de alumnos e alumnas de 3º ESO B puxéronse a traballar no guion, a gravar e presentaron un vídeo. Todo isto baixo a dirección da profe de Física, Ángeles.

Hoxe, están en Santiago, na Gala Final "Móvete co Bioetanol", porque o seu vídeo está entre os oitofinalistas. Que nervios! Podedes seguir a gala en directo. Empeza ás 11.00 h.

Desexámoslle moitísima sorte, porque o seu traballo é realmente bo. Para nós xa é un grande premio que estean aí. Podesde estar orgullosos e orgullosas. Desfrutade da gala!!!

Parabéns do equipo de biblioteca!!

PANDEIRETEIRAS

Xa nos estamos preparando para festexar o Día das Letras Galegas, este ano dedicado ás cantareiras. Mercamos Somos pandeireteiras, "un proxecto de pensamento, articulación social e cultural promovido pola investigadora, pandeireteira e compositora Mercedes Peón". 

Ademais, o equipo de biblioteca está moi orgulloso porque a nosa compañeira Andrea Nunes é unha das escritoras que participa neste libro, xunto a María Reimóndez, Ana Romaní, Susana Aríns e, por suposto, Mercedes Peón.

 

EL JUEGO DE ENDER

Tamén esta semana se xuntou o club Palabras con-ciencia para coller a nova lectura, El juego de Ender de Orson Scott Card.