FILLAS DE CASSANDRA

O pódcast Musicacastro.gal naceu este curso en 2º ESO nas materias de Lingua galega e Literatura e Música. Grazas a este proxecto, puidemos descubrir distintos grupos e estilos da música en galego que queriamos dar a coñecer. Cada episodio está dedicado a un artista diferente para coñecer de preto as voces, as letras e os ritmos que están a marcar o panorama musical galego. Episodio 1. Vega e Cata fálannos de Fillas de Cassandra e a súa canción Tataravoa.

LECTURAS PARA O VERÁN

NOVIDADES PLAMBE

Estas son algunhas das novidades PLAMBE que vos recomendamos para o verán.

Novidades PLAMBE de Biblioteca Castro Alobre

ENTREVISTAS EN RADIO CASTRO

Neste podcast realizado polo alumnado de PDC podedes escoitar dúas entrevistas moi interesnates e divertidas sobre dous temas de actualidade. Unha sobre os Therians, temos en exclusiva un que nos conta como é a súa vida; e a outra charla é sobre a nosa biblioteca, que nos gusta dela e que podemos cambiar para mellorala.

Esperemos que vos gusten!

LA VEGETARIANA

 A última xuntanza deste curso do Club do profesorado pódese resumir con dúas palabras: inquietante e perturbadora. Non pola reunión, por suposto, que foi coma sempre moi agradable; pero si pola lectura. Nestes dous adxectivos coincidimos todas para calificar o libro de Han Kang La vegetariana. Destacamos a prosa da autora, a utilización das palabras, a poesía do texto. Unha boa lectura para o verán.

Pola nosa parte, espérannos tres propostas: Esperando a mister Bojangles de Olivier Bourdeaut, La hija de Sergio del Molino e Ana no de Agustín Gómez Arcos.

Vémonos en setembro, Curuxainas!

LECTURAS MATEMÁTICAS BY RAFA

 O profe de Matemáticas, Rafa, fixo un boletín de lecturas para disfrutar das matemáticas no verán. Bastantes deles podedes atopalos xa na biblioteca. Outros, que parecen moi interesantes, formarán en breve parte da nosa biblioteca.

Grazas, Rafa, por esta magnífica selección e xa sabes que contamos contigo.

O CLUB DE ROTEIRO

 Rematamos este curso as reunións do Club de Lectura cun roteiro literario polas rúas de Santiago de Compostela. Tamén visitamos algunhas das súas librerías e mercamos novidades para a nosa biblio. Foi unha xornada moi divertida na que falamos de libros e coñecimos un pouco máis sobre autores como Lorca ou Rosalía.

Despedímonos ata o curso que vén
, pensando nas lecturas que nos esperan para estas vacacións.

E TI QUE CONTAS!

 Hoxe despedímonos por este curso do Club E ti que contas! Estivemos lendo e pasando un rato moi divertido coas aventuras do galo Quirico, un conto tradicional que ensina que, ás veces, non é bo ser un larpeiro. Despois, tivemos unha merendiña na cafetería para despedirnos ata setembro.

ANDRÉS DO BARRO

A Cidade do Libro de Vilagarcía tivo, este ano, un convidado moi especial para nós. Fernando F. Rego, membro do equipo da Biblioteca, presentou o seu libro Andrés do Barro. A xénese do pop en galego.

Despois de asinar libros, participou nas "Conversas ao solpor" con Sés e co músico e produtor catalán Miqui Puig. O tema sobre o que versou este encontro foi a relación entre a palabra escrita e a creación musical.

Parabéns a Fernando por esta nova publicación que esperamos teña moi éxito.

AGASALLANDO PALABRAS

 No último encontro do Club de Lectura Intercultural na Cruz Vermella agasallamos palabras.

Este foi o agasallo que nos deron:

E este foi o noso:

PENÉLOPE E CIRCE

Penélope e Circe son dúas mulleres da mitoloxía grega. Un grupo de estudantes de Grego fixeron un podcast con ton humorístico, contando a historia destas dúas mulleres e vencellándoa ao libro de Begoña Caamaño Circe ou o pracer do azul. 

CLUB DE LECTURA INTERCULTURAL

 No Club de Lectura Intercultural e Interxeracional, o Equipo de Correspondentes e Voluntariado reúnese na Cruz vermella de Vilagarcía con estudantes de español de diferentes nacionalidades. O obxectivo destes encontros é compartir para coñecer e nesta ocasión o tema foi "O Entroido". O alumnado voluntario fixo un vídeo no que recolleu o que máis lle chamou a atención. 

Grazas por deixarnos aprender de vós!

ERASMUS+ NAS AçORES

No marco da mobilidade Erasmus+ coas Açores, entrevistamos a Beatriz, profesora da Escola Secundária Domingos Rebelo, quen nos explicou a traxectoria e a importancia deste proxecto europeo no seu centro educativo. 

A continuación, as verdadeiras protagonistas desta experiencia, as alumnas participantes no intercambio, compartiron o seu testemuño. Explicaron como foi o proceso de selección para formar parte da mobilidade, falaron da experiencia de acoller nas súas casas e relataron as vivencias e aprendizaxes adquiridas durante a súa estadía na Galiza. A entrevista foi conducida por Ainara, alumna de 4º da ESO e participante nesta mobilidade como acolledora dunha estudante açorianas. 

Para terminar, Ainara convidou as alumnas a animar outros mozos e mozas a participar nos proxectos Erasmus+, destacando as oportunidades que os intercambios ofrecen. Esta experiencia puxo de manifesto, unha vez máis, como o galego pode actuar como unha valiosa ponte de comunicación coa lusofonía, facilitando o encontro entre culturas e fortalecendo os lazos entre Galiza e os territorios de fala portuguesa.

Con Pancho Lapeña

 Hoxe tivemos unha xuntanza moi especial no Club de lectura. Pancho Lapeña, profesor de Filosofía, escritor, deseñador gráfico e, sobre todo, un gran amante dos paxaros, falounos de como publicar un libro e de como deseñar unha capa. Foi unha charla moi interesante e esperamos que haxa unha segunda parte.

Os Sneetches

 Na xuntanza deste mes do Club E ti que contas? lemos Os Sneetches, unha historia tradicional inglesa cuns gansos moi divertidos. Aprenddemos que o importante non é que sexamos todos iguais, porque a diferenza nos fai persoas únicas. Esta vez tocounos ler na biblioteca do Colexio de Educación Especial.

LITERATURA DE CIENCIA FICCIÓN

 

Non delegues nun autómata, faino ti!

HEROES GREGOS

 O alumnado de Grego de 1º de bacharelato elaborou unhas preguntas sobre Hércules e Aquiles para unha actividade da biblioteca escolar pensada para 1º ESO. O alumnado debía buscar na sección de Mitoloxía (CDU 29) os libros seleccionados na bibliografía e atopar a información que se lles pedía.

Esta actividade tamén quería amosar esta atractiva sección ao alumnado.

Os heroes da mitoloxía grega 

I'M OBÉLIX

 Antón, Joel, Manuel e Dani déronlle vida neste podcast aos personaxes de I'm Obélix de Raquel Fernández.

DIARIO CULTURAL

 O luns celebramos o Día das Letras Galegas con actividades variadas nas que participou o alumnado dos diferentes cursos. Organizado por Normalización Lingüística, unha olimpiada cultural sobre Begoña Caamaño puxo a proba os coñecementos que sobre esta escritora tiñan alumnas e alumnos.

Un grupiño de estudantes de 2º ESO interpretou a obra de teatro "Asamblea xeral". Despois, o Diario cultural con Xián Pais achegou as inquietudes musicais deste rapero de Muros á rapazada de 3º, 4º ESO e de bacharelato. Esta entrevista gravouse para a radio escolar. Para iso, tivemos que trasladar a radio ao Salón de actos que, momentáneamente, se convertiu nun estudo de gravación.

    

LETRAS GALEGAS 2026

Este ano as Letras Galegas están adicadas a Begoña Caamaño. Podedes atopar na nosa biblioteca os dous libros que escribiu, moi recomendables para o alumnado de Bacharelato, e tamén biografías que nos dan a coñecer a súa vida como grande lectora e muller feminista e moi comprometida.

No ano 2015, cando as súas amizades publicaron o Libro das amigas, Sira Vidal, profesora do departamento de Lingua e Literatura galega do noso instituto, publicou neste blog as súas impresións sobre este libro que, por suposto, recomendaba. Cito as súas palabras "Nótase que o libro está feito desde o corazón, desde a dor, máis tamén desde o amor máis profundo. Poemas, cartas, desafogos... palabras para lembrar a amiga, a escritora, a muller comprometida coa liberdade, coa xustiza, co feminismo".

Recomendo a lectura da reseña deste libro. Clicar aquí.

MAPA DA ESTRÍA

 Mapa da estría é o libro de Andrea Nunes Brións que vén de recibir o Premio Follas Novas ao libro de poesía. Queremos felicitar a Andrea por este premio. Ela foi, o curso pasado, un membro moi activo da nosa biblioteca. Grazas a ela, puidemos achegar ao noso alumnado moitas voces da literatura galega actual. Ela tiña que presentarnos o seu libro xusto un día antes dos premios, pero unha nube negra impediu a súa presenza. Sabemos que poderemos contar con ela e, entón, tamén nos falará de Begoña Caamaño, quen lle deu voz a Circe e a Penélope, esas mulleres invisibles pero que, sen palabras, o din todo na literatura grega.

"A Begonha Caamaño, a nosa valente", adícalle un poema  en Mapa da estría, "De Circe a Penélope (ou viceversa)". Con permiso de Andrea, citarei dous versos dese poema, que recomendamos como todos os demais que configuran o libro premiado:

                                        como sería que un día, ebrias de saudade,

                                        saísemos destas liñas e bailásemos?

Parabéns, Andrea. Seguro que seguirás recollendo moitos froitos desa paixón túa, que é a poesía.

BRAIS DE MOMBOI

Hoxe a Biblioteca encheuse de música en galego. Deixamos os libros por un momento para escoitar a Brais Sánchez, voz, guitarra e letrista de Momboi. A rapazada puido escoitar a Brais cantando en galego e gustoulles, gustoulles moito. Tendo en conta que, polo menos no noso instituto, é moi pouco o alumnado que escoita e coñece cantantes en galego, foi todo un éxito a súa actuación. Seguro que o seguirán a escoitar.

Todos e todas as presentes pasamos un rato moi agradable. Despois da súa actuación, ía dar un obradoiro de voz ao coro, dirixido polo profe de Música Isma.

Grazas Brais e grazas Isma por achegarlles esta música á rapazada.

A RADIO EN GALICIA

 O alumnado de 4º ESO sumouse ao PDI na materia de Lingua e Literatura galega investigando sobre diferentes temas como "Fitos da historia da radio", pero tamén sobre a radio en Galicia. Despois de traballar coa información, tiveron que presentala na clase a través dunha infografía. Algúns dos temas tratados sobre a radio en Galicia foron:

- A primeira emisión radiofónica de Galicia (19 de dedcembro de 1932).

- Unión Radio Galicia no convento de San Domingos de Bonaval (1933).

- O vello dos contos, Xosé Mosquera Pérez, primeira estrela mediática galega.

- As emisións galegas en América: Recordando a Galicia, Sempre en Galicia, A hora de Galicia, La Voz de Galicia ou Galicia emigrante.

- O Galician Programme da BBC a partir de 1947.

- Elektra Sonne: as antenas de Hitler en Lugo.

- Da terra e dos tempos, programa da agrupación cultural O Facho (A Coruña).

- Radio As Mariñas: a primeira emisora municipal en galego (Oleiros, 25 de xullo de 1980).

- As retransmisións do fútbol en galego: primeira retransmisión do celta en 1983.

- O inicio da Radio Galega (24 de febreiro de 1985).

- As radios comunitarias en Galicia: radio Filispim, Radio Piratona, Radio Kalimera, radio Clavi, Radio Roncudo ou Cuac FM.

MÚSICA EN GALEGO

MOCIDADE E VOLUNTARIADO

 No Día da Cruz Vermella compartimos o podcast "Mocidade vermella" realizado por voluntarias do Castro Alobre. Nel entrevistan a Siara, unha traballadora da Cruz Vermella de Pontevedra e animan á mocidade a realizar voluntariado.

MENTIRA

 A reunión desta semana do Club foi para falar de Mentira de Care Santos. Foi todo un éxito, gustou moitísimo😍. Na xuntanza tratáronse distintos temas como as redes sociais, as mentiras das segundas oportunidades e, por suposto, falouse de namorarse.

A próxima e última lectura deste curso será El último trabajo del señor Luna de César Mallorquí, unha historia de misterio que seguro lles vai gustar.

ROTEIRO LITERARIO

O profesorado de Lingua e Literatura castelá levou ao alumnado de 4º ESO a visitar a Pobra do Caramiñal para darlle a coñecer a figura do grande escritor Valle-Inclán. Unha visita do máis intere
sante.

ROTEIRO LITERARIO

 O alumnado de 4º ESO acompañado polo profesorado de Lingua e literatura

galega visitaron a Casa Museo de Manoel Antonio. Ademais, fixeron unha xincana por grupos na que tiveron que amosar os seus coñecementos de cultura, literatura e historia da vial. Para rematar, cantaron a Rianxeira e recitaron poemas.

LENDO NA BIBLIOTECA

 Tamén o alumnado compartiu lecturas na Biblioteca para celebrar o Día do Libro. O alumnado de ESO leu textos dos diferentes xéneros literarios e, de paso, houbo quen aproveitou a ocasión para levar en préstamo algún libro.

día do libro de Biblioteca Castro Alobre

COMPARTINDO LECTURAS

O Equipo de Biblioteca promove no Día do Libro unha xuntanza do profesorado e persoal non docente arredor dos libros. Durante a semana previa a Compartindo lecturas, profesoras e profesores acoden á Biblioteca para buscar ese libro que lle queren "regalar" ao compañeiro ou compañeira que lle tocou en sorte. Acompañamos o reparto dos libros cuns petiscos doces e salgados e, por suposto, promovemos a lectura.

POEMAS PREMIADOS

Parabéns a Aldara, Uxía, Martín, Vega, Fernando e Alejandra polas súas poesías. Agradecemos tamén a participación ao alumnado neste concurso no que puideron amosar o seu talento poético. Foron moitos os poemas e moi bos, pero, finalmente estes seis son os que resultaron gañadores.