xoves, 16 de maio de 2019

LGTB

Cando deixaremos de ler estes titulares nos xornais? 
Apoio incondicional a todo este colectivo e, por suposto, ao noso grupo de Diversidade afectivo sexual e a súa coordinadora, Paloma, para que siga adiante normalizando esta situación.
Equipo de biblioteca




DÍA DAS LETRAS GALEGAS

Este ano o Día das Letras Galegas está adicado a Antón Fraguas.



“Esta muller ( mamá Antonia) era analfabeta, non sabía ler nin escribir, pero coñecía os costumes. Sabía oracións, coplas e contos. Moitos dos que eu coñezo ensinoumos ela. Foi a miña gran mestra”.  
"A miña modesta obra non é máis que un pequeniño gran de area no montón que foron facendo todos aqueles que, de moi distintas maneiras e cadaquén ó seu xeito, traballaron ó longo dos anos, traballan agora e seguirán traballando arreo no futuro, sempre desinteresadamente, non máis que polo ben de Galicia. Por amor á nosa Terra".
Recomendamos  estas lecturas.





venres, 10 de maio de 2019

AMOR AMARGO

Nesta Semana Escolar contra a Violencia de Xénero (do 6 ao 10 de maio), o alumnado de 3º PMAR está a ler Amor Amargo, un libro de Xosé A. Perozo, editado polo Concello de Vilagarcía de Arousa. Esta historia, protagonizada por mozos e mozas de idades próximas ás dos nosos lectores e lectoras, será o punto de partida dun debate acerca de como se debe afrontar a vida en parella nestas idades e, por suposto, ao longo de toda a súa vida.
 
O alumnado ve reflectidas nos protagonistas condutas ben coñecidas: a submisión total de Ana, a moza namorada, o aillamento das súas amizades, as desculpas pola actitude de Uxío; pero tamén, a imposición e o control total do mozo. As advertencias do grupo de amigos e amigas de Ana e os intentos de abrirlle os ollos non evitarán que Ana sufra en carne propia o abuso deste xoven maltratador.







venres, 3 de maio de 2019

ENCONTROS NA BIBLIOTECA


Agradecemos a Manuel Esperón e a Iñaki Fernández de 1º de bacharelato A a gravación do vídeo.

MEMORIA DO SILENCIO

O club de lectura do profesorado compartiu mesa con Eva Mejuto, autora de Memoria do silencio, para achegarlle a súa visión desta intensa obra.


Despois fixeron un roteiro por Pontevedra guiado por María Xesús López Escudeiro.


Agradecemos ás dúas esta marabillosa xornada.

martes, 23 de abril de 2019

DÍA DO LIBRO

Celebramos o Día do Libro, agasallando á comunidade educativa con lecturas doces.






SOPITA 2.0

Comezamos o concurso con Sopita 2.0. Esta primeira proba é moi sinxela. Xa temos un bo grupiño delas entregadas. Dádevos présa, aínda tedes ata o venres para poder participar.



luns, 22 de abril de 2019

BIBLIO.COM

Mañá comeza o concurso Biblio.com. Ao  longo de cinco semanas poderedes coñecer, a través das distintas probas, os medios de comunicación e diferentes formas de comunicar. 

Aquí vos deixo as bases do concurso. Os premios serán uns cheques para gastar nunha tenda de deportes.

Animádevos a participar!




LER POR PRACER, LER PARA APRENDER


venres, 29 de marzo de 2019

REFLEXIÓN SOBRE O CLUB DE LECTURA INCLUSIVA

Gústame o Club de Lectura Inclusiva, non só polo simple feito de ler senón porque, cando estou cos meus compañeiros  e compañeiras do Centro de Educación Especial e do Centro con Eles, síntome afortunada, xa que quizais eu, que teño unha vida fácil, non sei se podería vivir con algunha discapacidade.

Cando estou nas reunións, síntome un pouco incómoda. Non sei que palabras debería dicir. Explícome. Teño medo a dicir algo e ofender a algunha das persoas que están con nós. Tamén, ás veces, sinto vergoña.

Aos meus compañeiros e compañeiras dos outros centros véxoos felices. Creo que os alegra compartir tempo con nós, saír da súa rutina. Parécenme unha persoas moi valentes e riseiras, xa que a pesar de todas as dificultades que poidan ter seguen cara adiante e fano moi ben! Para rematar, o que máis me gusta delas é que sempre teñen un enorme sorriso plantado na cara.

Meritxell Triñanes (3º PMAR)



A FINAL DA VIAXE

Rematamos segundo trimestre no Club de Lectura Inclusiva coa lectura de 20000 leguas baixo dos mares. Despois de recordar os capítulos anteriores, limos o final do libro coa incerteza do que ía pasar. Ao remate da sesión, unhas lambetadas e unhas pinceladas sobre as seguintes sesións.


Non só temos grandes lectores e lectoras, senón tamén grandes artistas. Así recrearon os peixes do fondo do mar.



sábado, 23 de marzo de 2019

UN PECHE DE OURO


Debo aclarar que isto e só unha opinión.

Mercedes Peón é magnífica. Chegou e falounos da súa vida (da súa moi particular visión da vida), da música, da política, da vontade de ser unha mesma, un mesmo, un mesme (ela mesma defínise como interxénero).  Sen imposturas, sen divismos, sen falsas humildades.

Escoitala é sempre unha oportunidade de aprender e creo que aprendimos, eu si. A biblioteca quedouse pequena. Prometeu volver ao noso centro, esperaremos.
Un final intenso para unha semana da muller intensa.

 Un privilexio.
Grazas, Mercedes.

Paloma García

   






xoves, 21 de marzo de 2019

RECOÑECEMENTO DO CONCELLO

O Equipo de biblioteca agradece o recoñecemento do Concello tras obter o Sello CCB (Consello de Cooperación Bibliotecaria) polo proxecto Rescatando culturas.



Ler noticia aquí




xoves, 14 de marzo de 2019

TANIA BALLÓ, LAS SINSOMBRERO

A directora de cine, "produtora de ideas" e escritora, Tania Balló, descubriunos hoxe a Las Sinsombrero. Un cartel de luxo para un alumnado de 4º ESO e 2º de bacharelato que, unha vez máis, tivo un comportamento excelente.

Tania presentounos, a través do proxecto transmedia, ás mulleres que por dereito propio debían estar incluídas na Xeración do 27, pero foron esquecidas polos seus compañeiros e amigos deste grupo e, tamén, foron excluídas dos libros de texto. Pediu ao alumnado "una actitud crítica para combatir solo la visión masculina de la Generación del 27".


Comezou a charla facendo referencia ás palabras de Maruja Mallo, que contan o coñecido episodio de quitarse o sombreiro na Porta do Sol en Madrid e que foron a súa inspiración para poñerlle nome a este grupo de mulleres. Falounos, entre outras, de Margarita Manso, Maruja Mallo, María Teresa de León, Concha Méndez, Rosa Chacel e Ernestina de Champourcín. Mulleres "muy modernas para la época" e "ninguneadas por sus propios compañeros" nas poucas ocasións nas que falaron delas. Lembra que viviron os períodos históricos máis importantes do século XX (a ditadura de Primo de Rivera, a Segunda República, a ditadura franquista, a transición e a democracia) e que, nalgúns casos,  (tamén eles) se ven obrigadas a exiliarse durante o franquismo. Momentos duros de tristeza e soidade.


O obxectivo de Tania Balló con este proxecto é que o seu traballo axude a descubrir a estas mulleres, que o alumnado as reivindique nas distintas materias. Todas elas foron mulleres que crearon obras importantes, que expuxeron e publicaron.

Ao final, houbo un tempo para preguntas que se quedou curto, "Es la primera vez que veo tantas manos levantadas", dixo. O alumnado interesouse por cuestións como se ía seguir investigando sobre mulleres desta xeración (haberá un terceiro libro, pero será o último), se gañaban o suficiente diñeiro para vivir, se pensaba estender o estudo a mulleres científicas, se se considera o punto de partida en dar a coñecer a estas mulleeres ou cal é a súa Sinsombrero preferida. A resposta a esta última pregunta, despois de pensalo, foi María Zambrano.


Queremos agradecer a Tania Balló a súa presenza no noso instituto por achegarnos a estas mulleres marabillosas, necesarias e imprescindibles. Compartimos con ela o seu anhelo por desexar vivir nunha sociedade na que non tivese que reivindicarse como muller. 



E, para rematar, recomendar a lectura dos seus libros, porque realmente son unha fonte de información estupenda para comprender este momento histórico tamén con elas; e compartir as palabras de Tania Balló "Las Sinsombrero son todas las mujeres que lucharon por ser ellas mismas".