DÍA DA PAZ

Conmemoramos o Día da Paz e o Día Internacional contra o Uso de Menores Soldado para denunciar o recrutamento forzado de nenos e nenas nunha listaxe ben longa de países.

O alumnado de 3º PDC informouse sobre este tema na biblioteca e elaborou un mural, recomendando dous libros de Gervasio Sánchez, Salvar a los niños soldado e Vidas minadas, Diez años.

DI NON AOS MENORES SOLDADO!

Como cada 12 de febreiro, o alumnado de 3º PMAR quere dar a coñecer a existencia dos menores soldado. Despois de tratar en profundidade o tema na clase e recomendalo, tamén, ao resto do profesorado, recolleron nun mural os aspectos básicos desta grande inxustiza e violación dos dereitos dos menores. Outro tema sobre o que reflexionar e do que a biblioteca sempre proporciona material recompilado neste blog ao longo dos anos.

día internacional contra o uso de menores soldado de Biblioteca Castro Alobre

MENORES SOLDADO, VÍTIMAS OU CULPABLES?

O 12 de febreiro conmemórase o Día Internacional contra o Uso de Menores Soldado, día que debemos recordar porque supón unha violación extrema dos dereitos humanos dos nenos e nenas. É un tema do que pouco se fala e que deberiamos ter presente cada un dos nosos días.

Unha infancia perdida, cruel e unha vida condicionada polos terribles actos que se viron obrigados a cometer. Aínda hai debate sobre como considerar a estes menores,

         vítimas ou culpables? 

Pero, antes de respostar, deberiamos facernos outra pregunta, 

        tiveron elección?

Urxen os programas de reinserción e a implicación seria da comunidade internacional. Mentres, desde o blg da nosa biblioteca, denunciamos esta práctica e facemos o que está na nosa man para sensibilizar ao noso alumnado ante este tema.

CONTRIBUÍNDO Á EDUCACIÓN

Despois de tantos días con malas novas, recibimos unha noticia esperanzadora. Recordaredes que o Día Internacional contra o Uso de Menores Soldado todo un experto no tema, Chema Caballero, estivo no noso instituto para dar a coñecer a situación dos nenos e nenas soldado. Todo un privilexio. Pois ben, recibimos un correo da ONG DYES (Desarrollo y Educación Solidaria), http://ongdyes.es/,  coa boa nova de que grazas á aportación da biblioteca (entre outras) por mor da charla anteriormente citada, tres xóvenes de Serra Leoa se puideron graduar na universidade.

É todo un orgullo para a nosa biblioteca seguir colaborando con proxectos solidarios.

Timothy S. Conteh

Samuel Samura

Daniel Kadalie Kamara

NENOS E NENAS SOLDADO

Chema Caballero, asesor de ONG e escritor, impartiu unha clase maxistral sobre nenos e nenas soldado. Achegoulles ao alumnado asistente ampla información acerca do que significa ser menor soldado e por que se utilizan a menores "son más fáciles de manipular, no cuestionan las órdenes, no se les paga; se les convierte en máquinas de matar". Contou como é ese proceso de manipulación desde o secuestro (preferentemente nas escolas), pasando polos campamentos (nos que se leva a cabo unha selección natural, xa que moitos morren) e rematando nos campos de entrenamento nos que reciben instrución militar.

As historias que nos contou Chema Caballero son realmente escalofriantes e terriblemente crueis tendo en conta, ademais, que se trata de nenos e nenas. Insistiu moito no papel das nenas vítimas desta situación e que , moitas veces, permanecen invisibles pero son doblemente perxudicadas debido ás violacións e abusos sexuais que sofren, a súa mortalidade prematura a causa dos partos e á dificultade de reinserción, ao ser rexeitadas polas súas familias.

Como referente para el, Graça Machel, un dos grandes personaxes do século XX-XXI. No ano 1996 elaborou un informe sobre o impacto dos conflitos armados nos menores, a partir do cal a comunidade internacional empezou a establecer unha serie de normas para previr o recrutamento dos mesmos.

A última parte da charla serviu para dar resposta a por que segue habendo menores soldado e para introducir o motivo das guerras actuais, "No existen guerras de religión ni guerras étnicas. Detrás de los conflictos hay una materia prima". Falou, entón, dos diamantes, coltán, uranio, petróleo. E, tamén, da venda de armas.

Finalmente, a cara positiva de todo este proceso, a rehabilitación e reinserción. Contounos Chema Caballero a súa experiencia en Saint Michael, o longo e duro traballo cos nenos e nenas e coas súas familias. Son moitos os menores que conseguen, con todos os seus medos, volver a ter unha vida "normal". Son aceptados no seu entorno, atopan traballo, forman a súa propia familia. Pero hai unha cara negativa. Non todos conseguen superar esta fase e volven ás guerrillas ou, no caso das nenas, prostitúense. Na última foto (de Gervasio Sánchez) aparece Chema con nenos e unha nena, que non conseguiu reinsertarse e, finalmente, morreu de sida.

Esperamos que a mensaxe calase entre o alumnado e servise para reflexionar. Tapar os ollos ou non querer saber non contribúen a loitar contra as inxustizas e a desigualdade.

Grazas a Chema por aceptar a invitación. Foi un honor poder contar con el no Castro Alobre.

CHEMA CABALLERO E OS MENORES SOLDADO

O 12 de febreiro conmemórase o Día Internacional contra o Uso de Menores Soldado. Chema Caballero contaralle as súas experiencias en Serra Leoa ao alumnado de 4º ESO e 1º de bacharelato. En 1992 viaxou a este país africano para poñer en marcha un programa de rehabilitación destes menores. Seguro que aprenderemos moito deste gran problema que "non está de moda", pero que reflicte unha realidade terrible e cruel do mundo no que vivimos.

+info http://bibliocastroalobre.blogspot.com/2018/01/blog-post.html
         http://bibliocastroalobre.blogspot.com/2019/02/menores-soldado.html

mm

MENORES SOLDADO

O 12 de febreiro conmemórase o Día Internacional contra o Uso de Menores Soldado.

Máis información Aquí

MENORES SOLDADO

A Biblioteca quere unirse á conmemoración de dous días importantes:

- o 30 de xaneiro, Día Escolar da Non Violencia e a Paz

- o 12 de febreiro, Día Internacional contra o Uso de Menores Soldado

Queremos que coñezades testemuños de nenos e nenas soldado que aínda se seguen a recrutar, segundo datos da ONU, en dezasete países. Testemuños realmente arrepiantes, que nos achegan ás atrocidades e ao sufrimento vivido por uns 300.000 menores.

Que estes documentos escritos e visuais nos sirvan para reflexionar.

Menores Soldado

Accede desde aquí aos vídeos