FILLAS DE CASSANDRA

O pódcast Musicacastro.gal naceu este curso en 2º ESO nas materias de Lingua galega e Literatura e Música. Grazas a este proxecto, puidemos descubrir distintos grupos e estilos da música en galego que queriamos dar a coñecer. Cada episodio está dedicado a un artista diferente para coñecer de preto as voces, as letras e os ritmos que están a marcar o panorama musical galego. Episodio 1. Vega e Cata fálannos de Fillas de Cassandra e a súa canción Tataravoa.

ENTREVISTAS EN RADIO CASTRO

Neste podcast realizado polo alumnado de PDC podedes escoitar dúas entrevistas moi interesnates e divertidas sobre dous temas de actualidade. Unha sobre os Therians, temos en exclusiva un que nos conta como é a súa vida; e a outra charla é sobre a nosa biblioteca, que nos gusta dela e que podemos cambiar para mellorala.

Esperemos que vos gusten!

PENÉLOPE E CIRCE

Penélope e Circe son dúas mulleres da mitoloxía grega. Un grupo de estudantes de Grego fixeron un podcast con ton humorístico, contando a historia destas dúas mulleres e vencellándoa ao libro de Begoña Caamaño Circe ou o pracer do azul. 

ERASMUS+ NAS AçORES

No marco da mobilidade Erasmus+ coas Açores, entrevistamos a Beatriz, profesora da Escola Secundária Domingos Rebelo, quen nos explicou a traxectoria e a importancia deste proxecto europeo no seu centro educativo. 

A continuación, as verdadeiras protagonistas desta experiencia, as alumnas participantes no intercambio, compartiron o seu testemuño. Explicaron como foi o proceso de selección para formar parte da mobilidade, falaron da experiencia de acoller nas súas casas e relataron as vivencias e aprendizaxes adquiridas durante a súa estadía na Galiza. A entrevista foi conducida por Ainara, alumna de 4º da ESO e participante nesta mobilidade como acolledora dunha estudante açorianas. 

Para terminar, Ainara convidou as alumnas a animar outros mozos e mozas a participar nos proxectos Erasmus+, destacando as oportunidades que os intercambios ofrecen. Esta experiencia puxo de manifesto, unha vez máis, como o galego pode actuar como unha valiosa ponte de comunicación coa lusofonía, facilitando o encontro entre culturas e fortalecendo os lazos entre Galiza e os territorios de fala portuguesa.

I'M OBÉLIX

 Antón, Joel, Manuel e Dani déronlle vida neste podcast aos personaxes de I'm Obélix de Raquel Fernández.

DIARIO CULTURAL

 O luns celebramos o Día das Letras Galegas con actividades variadas nas que participou o alumnado dos diferentes cursos. Organizado por Normalización Lingüística, unha olimpiada cultural sobre Begoña Caamaño puxo a proba os coñecementos que sobre esta escritora tiñan alumnas e alumnos.

Un grupiño de estudantes de 2º ESO interpretou a obra de teatro "Asamblea xeral". Despois, o Diario cultural con Xián Pais achegou as inquietudes musicais deste rapero de Muros á rapazada de 3º, 4º ESO e de bacharelato. Esta entrevista gravouse para a radio escolar. Para iso, tivemos que trasladar a radio ao Salón de actos que, momentáneamente, se convertiu nun estudo de gravación.

    

MOCIDADE E VOLUNTARIADO

 No Día da Cruz Vermella compartimos o podcast "Mocidade vermella" realizado por voluntarias do Castro Alobre. Nel entrevistan a Siara, unha traballadora da Cruz Vermella de Pontevedra e animan á mocidade a realizar voluntariado.

O CABELO É POLÍTICA

Elisa May, estudante de 3º ESO, fálanos neste podcast da importancia que ten o cabelo para as mulleres e o que representa na arte, literatura, cultura pop...

FÓRA DE FOCO

 Valentina, alumna de 1º ESO B, fixo un podcast sobre os estándares de beleza, tanto na vida cotiá coma nas redes sociais e como afectan a nosa sociedade de hoxe en día. con este podcast participou no concurso convocado pola biblioteca.

CULTURA XITANA

Para celebrar a semana do pobo xitano, en "Non calamos. Radio Castro" estivemos a conversar co alumnado xitano sobre algunhas características da súa cultura.

No podcast que vos ofrecemos a continuación, catro rapazas falan de como funciona o pedimento e o o casamento na súa cultura.

THERIANS

Este podcast foi elaborado polo alumnado de 4º PDC arredor do fenómeno Therian, entendido como punto de partida para reflexionar sobre o respecto á diversidade, ás distintas identidades e ás diferentes maneiras de sentir e entender o mundo.

Parabéns a Madeleine, Kevin, Paola, Carlos e Aron. 

DÍA DA MULLER E DA NENA NA CIENCIA

Paula e Rocío, alumnas de Oratoria de 3º ESO E, gravaron un podcast para darmos a coñecer a visión de catro profesoras, de diferentes xeracións, sobre as súas carreiras científicas: Matemáticas, Bioloxía e Física e Química.

ROSALÍA EN RADIO CASTRO

No Día de Rosalía, Paula e Rocío -alumnas de Oratoria que forman parte do Equipo de Correspondentes- puxéronse ante os micros de "Non calamos. Radio Castro" para ler o manifesto da AELG escrito por Eva Veiga. Animámosvos a escoitar porque, como Rosalía, nós tampouco nos resignamos. "Con ela queremos loitar contra o patriarcado, contra a trata de seres humanos, contra o autoritarismo, contra todas as inxustizas e a prol dunha humanidade responsable que coida da infancia e da educación humanista, aberta ao outro, ao diferente, capaz de mostrar empatía e colaboración".

A RADIO

 O 13 de febreiro é o Día Internacional da Radio; por iso, queremos fomentar este medio de comunicación e convidarvos a participar no Proxecto Documental Integrado deste curso "A radio como ferramenta educativa".

Ademais, desde "Radio Castro. Non calamos", a nosa radio, convocamos un concurso de podcast.

Esperamos que haxa moita participación!

ESPECIAL SAMAÍN

E xa temos un novo podcast o Especial Samaín.

Este Samaín converteuse nunha celebración da diversidade cultural na Biblioteca do Castro Alobre. O equipo de Correspondentes gravou un podcast no que o alumnado de 1º e 2º da ESO compartiu as lendas e tradicións das súas familias, procedentes de lugares tan distintos como Galicia, Arxentina, Venezuela, Uruguai, Bulgaria, Hungría ou da comunidade xitana.

VISITA A RADIO AROUSA

 O mércores 22 de outubro o alumnado de 4º ESO de Oratoria tivo a oportunidade de visitar, un ano máis, Radio Arousa e aprender das persoas profesionais que cada día nos achegan as noticias da comarca.

Durante a visita, o alumnado tivo o privilexio de contar coa presenza do alcalde de Vilagarcía, Alberto Varela,que foi entrevistado por Bruno, Joel, Madeleine, Damián, Helena, Antón e Sofía. O alcalde respondeu con cercanía a todas as preguntas e contou que el mesmo estudara no IES Castro Alobre, lembrando canto cambiou o centro desde aquela etapa.

Esta actividade foi posible grazas á nosa participación nos Premios José Hermida, que nos permiten seguir aprendendo e coñecendo o mundo radiofónico.

Aquí podedes escoitar o podcast.

DÍA EUROPEO DAS LINGUAS

En "Non calamos. Radio Castro" non podiamos deixar pasar un día tan sinalado como o Día Europeo das Linguas. Por iso, dámoslle voz a dúas exalumnas, Alisha Sheraz e Lidia Dos Anjos. Neste podcast falan da oralidade que, como elas mesmas din "non entende de fronteiras, só de emocións". Convídannos, polo tanto, a celebrar a riqueza da diversidade lingüística a través da narración de historias, pois estas serven para coñecermos outras culturas, así como para romper prexuízos.

Alisha e Lidia contan as historias que a elas lles contaban, historias de dúas culturas (paquistaní e xitana) que se unen neste podcast.

Elas xa non están no noso centro, pero estamos seguras de que seguirán transmitindo as súas historias e a súa cultura con orgullo.

ESPECIAL PALESTINA

No día no que o estudantado decidiu parar para deter o xenocidio, parte do Equipo de Correspondentes de "Non calamos. Radio Castro" alzou a voz para contar o que está a suceder.

Neste podcast "Especial Palestina", reproducimos a mensaxe que nos enviou a activista Sandra Garrido -agora mesmo secuestrada- minutos antes da interceptación por parte de Israel.

Hai que parar este xenocidio! Palestina libre!

PODCAST RADIO CASTRO

 Publicamos os últimos Podcast da nosa radio escolar. 

Máis info en https://sites.google.com/view/biblioradiocastro/inicio

Podcast resumo Gala Premio José Hermida (Cadena Ser).

Podcast "Dieta saudable" (Proxecto eTwinning)

Podcast Entrevista a unha traballadora da Cruz Vermella,

PREMIOS JOSÉ HERMIDA

 O 9 de maio foi a gala dos Premios José Hermida. Radio Escolar 2025, convocado por Radio Pontevedra, Cadena Ser. O alumnado do noso centro recibiu o seu merecido Premio especial Edicións Xerais polo podcast "Somos pandereiteiras", no que Alexandra, Roi, Lian, Lúa e Paula (3º ESO B), entrevistaron a súa profe e titora, Andrea Nunes que xunto a outras "pandereiteiras" se uniron para homenaxear as mulleres que deron e dan voz á nosa cultura. 

Este premio é moi especial porque a nosa radio "Non calamos. Radio Castro" case naceu con estes premios, que serven de impulso para continuar e facer medrar esta ferramenta educativa tan poderosa que fomenta o traballo en equipo e a creatividade.

Foi un día tamén moi intenso no que aproveitaron para facer varias entrevistas, entre elas, ao presidente da Xunta, Alfonso Rueda, ao que lle preguntaron a súa opinión sobre a importancia da radio na formación do alumnado.