RAÍCES DA LINGUA

Raíces da lingua quere visibilizar as escritoras galegas que son premios nacionais. Fina Casalderrey, Ledicia Costas, Pilar Pallarés, Olga Novo, Yolanda Castaño, Chus Pato, Alba Cid, Marilar Aleixandre, Paula Carballeira, Ana Romaní e Bea Lema.

Algunhas delas mandaron un vídeo para o noso alumnado. Queremos agradecer a Andrea (profe de galego) que nos achegase estas importantes voces da nosa literatura, as nosas voces.

Pilar Pallarés, Premio Nacional de Poesía 2019. Moitas grazas por achegarnos este fermoso poema.

Ana Romaní, Premio Nacional de Xornalismo Cultural 2018. Que marabilla escoitala!!!

Chus Pato, Premio Nacional de Poesía 2024 cun poema de Sonora.

Marilar Aleixandre, Premio Nacional de Narrativa  2022 por As malas mulleres.

Ledicia Costas, Premio Nacional de Literatura Infantil e Xuvenil 2015 por Escarlatina e a cociñeira defunta. Tantas veces lida no instituto, escoitade con atención a súa mensaxe.

Yolanda Castaño, Premio Nacional de Poesía 2023 polo seu libro Materia. Grazas por dedicarlle uns minutos ao noso alumnado neste día.

Alba Cid, Premio Nacional de Poesía Joven "Miguel Hernández" (2020) polo seu libro Atlas. 

Un Día das Escritoras marabilloso, un auténtico luxazo. 

Grazas a todas por compartir os vosos poemas co noso alumnado.

DÍA DAS ESCRITORAS

 O 14 de outubro celébrase o Día das Escritoras. Un ano máis sumámonos á iniciativa da Biblioteca Nacional de España en colaboración coa Federación Española de Mujeres Directivas, Ejecutivas, Profesionales y Empresarias (FEDEPE) e coa Asociación Clásicas y Modernas. O tema desta IX edición é "La periferia de la periferia: mujeres que miraron al mundo rural". 

Esperamos que, este luns, na Hora de Ler o profesorado lea algún texto dos seleccionados pola comisaria Ana Iris Simón, que xa están na Aula Virtual.

Tamén recomendamos a lectura de Fisteus era un mundo de Lupe Gómez.

Ademais, desde a Biblioteca promovemos Raíces da lingua para difundir e visibilizar as escritoras galegas que son premios nacionais en narrativa, poesía, teatro, cómic ou xornalismo. 

Diseño de Biblioteca Castro Alobre

AS MULLERES NON TEÑEN LÍMITES

O proxecto de Educación Física para o PDI consistiu en dar maior visibilidade ás mulleres, sobre todo, ás mulleres deportistas, e dar valor ao seu esforzo, así como animar a aoutras nenas e mulleres a seguir os seus pasos, non só deportivamente falando, senón en todos os campo da vida, sendo estas un exemplo positivo de esforzo e superación.

HELEN KELLER

Un exemplo de superación é o de Helen Keller, escritora, activista e oradora sordocega. Sara, Antón, Carlota, Guillermo e Andrés (4º ESO A) dánnola a coñecer. 

Lectura moi recomendable.

AS MULLERES DO IES CASTRO ALOBRE

O alumnado de Imaxe e Son gravou estes vídeos no Día da Muller Traballadora.

A CIENCIA TAMÉN É COUSA DE MULLERES

Para conmemorar o Día Internacional da Muller e da Nena na ciencia, recomendamos lecturas e damos a coñecer a algunhas científicas que o alumnado, que se achegue ata a biblioteca, poderá ver nuns cartaces sobre as mesas.

Ademais, achegamos a ligazón da entrada do blog de Comunidad Baratz, na que se nos fala de sete científicas que traballaron como bibliotecarias. A que non o sabías?

Estas mulleres son: a astrónoma Maria Mitchell, a matemática Mary Everest Boole, a botánica Anna Murray Vail, a lexicógrafa María Moliner, a astrónoma Ruby Violet Payne-Scott, a programadora Henriette Avram e a geógrafa Selma Huxley.

Máis info aquí.

Foto publicada no blog Comunidad Baratz

DEFENSORAS DE DEREITOS

A biblioteca volve á súa actividade e hoxe acolleu un obradoiro impartido por Sofía, membro de Agareso e colaboradora coa Coordinadora Galega de ONG. Compartiu co alumnado de 3º ESO D unha lectura, Miriam de Suazo y la digna rabia, e convidou á reflexionar sobre a necesidade de defender os dereitos das mulleres (ou diferentes colectivos) que sofren discriminación, cuestións actuais e moi interesantes. Tamén puxo o obxectivo sobre un país, Honduras, do que, coma moitos, non se fala a cotío e, cando se fai, é para destacar aspectos negativos. Como explicou a rapazada, asocian Honduras a "asasinatos, pobreza, machismo, violacións, corrupción". 

Comentouse o impacto das catástrofes naturais en países menos desenvolvidos, nos que é máis complicada a reconstrución das perdas e as axudas pola pobreza e falta de recursos. Defendeu, Sofía, a utilización de termos como Norte global e Sur global en lugar de países do primeiro ou terceiro mundo, máis utilizados polo alumnado.

Reflexionaron, a continuación, sobre os sentimentos que se podían experimentar polas "desaparicións" de persoas en Honduras e en outros países que sofriron ditaduras, e falouse das migracións e de como se tratan nos medios de comunicación con esas "oleadas masivas" que chegan a España e, como comentou Sofía, deshumanizan estas situacións.

Outras cuestións que se trataron a medida que iamos avanzando na lectura do libro foron as poboacións indíxenas, as diferentes discriminacións ou o significado do termo sororidade.

O alumnado, timidamente, foi reflexionando sobre os puntos que Sofía lle ía salientando e, aínda que non se atreveron a un grande debate, foron aportando algunha opinión.

As conclusións ás que chegaron ao final do obradoiro foron que se debía tratar a todas as persoas por igual; que, se a xente se une, pódese chegar máis lonxe; que hai que loitar polos soños e que Honduras é un país que atravesa unha mala situación.

Por último, pensan que o obradoiro serve para concianciar ao alumnado sobre temas importantes na nosa vida.

Grazas, Sofía, por achegarlle a Miriam de Suazo a través da lectura e por facerlles chegar un pouquiño máis alá. Seguro que nas súas cabezas levaron ideas para reflexionar.

MULLERES DE LIBRO

 O alumnado de 1º ESO B e E deu a súa visión das personaxes femininas dos libros que lle gustan. Estes son algúns exemplos das portadas que crearon.

ENTREGA DE PREMIOS

Hoxe entregamos os premios do concurso A través do espello. Unha vez máis, quixemos axudar ao comercio local e, por iso, entregamos bonos para mercar en calquera tenda de Zona Aberta.

Parabéns ao alumnado premiado!!

                        

MULLERES DE LIBRO: MERCEDES E LAURA

 Laura Crussat ou Laura Mulish é a protagonista de Laura no deserto de Antón Riveiro Coello. Hai uns anos esta foi unha das obras seleccionadas para ler no club de lectura, A curuxa sabia. Puidemos seguir a traxectoria vital de Laura, pero tamén de Mercedes Núñez, unha muller excepcional que estivo presa no cárcere de Ventas e, logo, nun campo de concentración nazi. Foi en Mercedes en quen Riveiro Coello se inspirou para crear a personaxe de Laura.

MULLERES DE LIBRO: IRMINA

Irmina chega a Londres nos anos 30 en busca de traballo, pero as cousas non lle van ben e decide regresar a Alemaña. Alí, buscando o seu benestar, vai aceptando os comportamentos brutais do réxime nazi.

Barbara Yelin, inspirándose na vida  da súa avoa, intenta explicar, nesta novela gráfica, como tantas persoas, que viviron na Alemaña nazi, foron quen de mirar para outro lado e ignorar os crímenes nazis.

Unha lectura para reflexionar.

MULLERES DE LIBRO: LOXANDRA

 Makrojori, un barrio de Constantinopla (como lle seguen a chamar os gregos que viven en Estambul), e Loxandra, unha muller chea de grandeza, de optimismo, unha auténtica loitadora e supervivinte. Os sabores e olores, como non podía ser doutro xeito tratándose de Estambul, mestúranse cunha vida sinxela e cargada de emotividade.

María Iordanidu (Constantinopla, 1897-Atenas, 1989) publicou esta primeira novela aos sesenta e cinco anos. Un tributo a súa avoa. A súa lectura paga a pena.

MULLERES NO DEPORTE: KATHERINE SWITZER

O alumnado do IES Castro Alobre correu, esta mañá, pola igualdade. A proposta do departamento de Educación Física, os alumnos e alumnas (e tamén o profesorado) participou nunha carreira simbólica en homenaxe a esta muller pola súa achega á igualdade de xénero no deporte e empoderamento da muller.

Katherine Switzer foi a primeira muller en correr un maratón, de maneira oficial, en Boston, no ano 1967, aínda que estaba prohibido para as mulleres. Utilizou o dorsal 261, o mesmo número co que se correu no instituto.

MULLERES DE LIBRO: MULLERES OBREIRAS

Matilde, Antonia, Marta, Paca son os nomes de muller que loitan por sobrevivir no Madrid dos anos 30. A maioría acepta a súa situación sen facerse preguntas, pero a protagonista, Matilde, é un espíritu rebelde que quere acadar os dereitos que lle corresponden e emanciparse. Un salón de té distinguido é o marco no que Luisa Carnés nos achega o mundo obreiro feminino e as súas miserias. 

O libro, Tea Rooms: mujeres obreras. Altamente recomendable.

Día Internacional da Muller Traballadora

PARABÉNS, SIRA

Hoxe, recibimos unha grata noticia. Sira Vidal, profesora de Lingua galega hai uns anos no noso centro, foi a gañadora do XI Certame de Relatos de Muller Matilde Bares, convocado polo Concello de Bueu. O seu relato "O espertar do teu nome" aborda a emigración  vivida polas mulleres en Galicia.

Este premio, recibido pola nosa compañeira, lévanos a lembrar, tamén, o seu magnífico labor á fronte do Club de lectura A curuxaina. Lecturas diversas, xuntanzas con escritores e escritoras, roteiros literarios foron algunhas das súas incansables propostas, para reunir ao alumnado nun faladoiro de libros e, tamén, ao profesorado arredor dunha boa mesa ou dun café. Momentos agradables de lembranzas lectoras.

Parabéns, Sira, e quen sabe se algún día estaremos a comentar a túa obra?

MULLERES DE LIBRO: GABRIELA

Gabriela é a protagonista do libro de Josefina Aldecoa que queremos propor, Historia de una maestra, unha homenaxe a súa nai e aos maestros e maestras da República que chegaban a pobos lonxanos, nos que a lectura e a escritura non formaban parte das prioridades para as crianzas.

No prólogo do libro escribe a autora: " La historia es ficticia, pero todo lo que ocurre en ella es real, es un testimonio histórico que sirve, además, para conocer las durísimas condiciones de trabajo de los profesores rurales y el papel tan importante que desempeñaron haciendo gala de una constante vocación".

MULLERES DE LIBRO: LAS REINAS DE ÁFRICA

 A xornalista, Cristina Morató viaxou a África igual que o fixeron as protagonistas do seu libro. 

Aventureiras e valentes, estas once mulleres recorreron o continente africano entre o século XIX e XX. Estes son os seus nomes: Mary Livingstone, Mary Slessor, Lady Juana Smith, Isabel de Urquiola, Alexine Tinne, Florence Baker, Mary Kingsley, Karen Blixen, Beryl Markham, Delia Akeley e Osa Johnson.

MULLERES DE LIBRO: ROSA PARKS

A muller que hoxe propoñemos, para quen a descoñeza ou para quen queira achegarse de novo a ela, é Rosa Parks, unha muller negra que amosou a súa valentía e determinación, ao non ceder o seu asento a un home branco, nun autobús. Un xesto que impulsou un aluvión de protestas e manifestacións que acabarían coa segregación racial nos espazos públicos, en EEUU.
Podedes atopar estes dous libros na biblioteca, se queredes coñecer mellor a esta muller. A edición de Vicens Vives, para o alumnado dos cursos inferiores, e a novela gráfica para calquera idade. Unha lectura para recomendar desde distintas materias.

MULLERES DE LIBRO: MARÍA BARBEITO

María Barbeito (1880-1970) defendeu os dereitos das mulleres e traballou pola súa emancipación social, cultural e profesional. Recoñecida socióloga, pedagoga, escritora e profesora, implantou, por primeira vez, en Galicia o método Montessori.

Podedes afondar na vida desta gran muller no libro de Ana Romero, "María Barbeito, unha vida ao servizo da escola e dos escolares".

MULLERES DE LIBRO: MARÍA VINYALS

 

María Vinyals (Soutomaior, 1875), coñecida como a "marquesa vermella", foi unha das primeiras feministas de Pontevedra. Interesouse pola arte, pola literatura, pola política. Ademais, foi nomeada académica da Real Academia Galega (1906). 

Fixo amizade con Emilia Pardo Bazán e María Barbeito.

Se vos interesa coñecer máis a fondo a esta muller, podedes atopar na biblioteca un libro coa súa biografía.