mércores, 16 de xuño de 2021

LENDO LIBROS

Nada mellor para rematar o curso que os libros recomendados polo alumnado. Escoitade estes fragmentos lidos por David, Pepe, Catalina, Rubén, Virginia, Sofía, Alba, Julia e Sergio de 1º ESO B, sempre con boa disposición para colaborar nas actividades.









xoves, 10 de xuño de 2021

INCULTURA

Incultura é o diagnóstico de Acacio Robledal cando se atopa con "La biblioteca de los libros vacíos". Este libro de Jordi Sierra i Fabra amosa a importancia que ten ler e pon a esperanza na xuventude. 

Este é un exemplo dos estupendos collages elaborados polo alumnado de 1º ESO B e E.

Moitas grazas a todos e todas polo voso esforzo ao longo deste curso diferente e, tamén, en certo sentido, cos libros vacíos. 

martes, 1 de xuño de 2021

luns, 31 de maio de 2021

ÚLTIMAS XUNTANZAS DO CLUB DE LECTURA

A coordinadora do Club, Raquel, repartiu a última lectura de banda deseñada. Esta vez, intentou personalizar o libro, entregando a cadaquén aquel que pensaba que se asemellaría aos seus gustos. Tamén comentaron as lecturas anteriores.
Podedes atopar máis información nesta ligazón:

venres, 28 de maio de 2021

LETRAS NO ALOBRE

    Celebramos as Letras no Alobre e, por fin, a biblioteca puido expoñer os libros. Ofrecemos ao alumnado algunhas das novidades que non coñecía. Entre os máis prestados, os manga e os de temática LGTBI. Teremos que mercar máis, xa que gustan.

Ademais, houbo outras actividades relacionadas coas letras.
Recital poético
Recital poético

Teatro

Obradoiro de portugués
Obradoiro de tradución

E os murais adicados a Xulio Verne, Arthur Conan Doyle, Xela Arias, Emilia Pardo Bazán e George Orwell.


martes, 18 de maio de 2021

LECTURAS LGTBI

 O 17 de maio é o Día Internacional contra a Homofobia, Bifobia e Transfobia; por iso, quixemos compartir algunhas das lecturas que temos na biblioteca. 

A exposición de libros está no vestíbulo do instituto e, por suposto, podedes solicitalos en préstamo.

venres, 14 de maio de 2021

HOMENAXE A XELA ARIAS

O 17 de maio celébrase o Día das Letras Galegas e, este ano, a autora homenaxeada é Xela Arias, unha das cinco mulleres ás que se lle adicou este día. Ben poucas.

Poesía reunida, Darío a diario ou Intempériome son algúns dos títulos que podedes atopar na biblioteca.

Ademais, queremos compartir o traballo que o Departamento de Lingua Galega fixo co seu alumnado. Podedes ver as fotos dos murais e a presentación Xela no Alobre realizada pola profesora Mónica Rodríguez para 1º de ESO.

Parabéns polo voso traballo e grazas por compartilo.

                   





xoves, 13 de maio de 2021

POEMAS NO POEMAS

Concha Barreiro, profe de Música do noso instituto, vén de publicar un libro de poemas. Xa o podedes pedir prestado na biblioteca. Seguro que vos gustará!

Parabéns, Concha, por este primeiro libro!

domingo, 9 de maio de 2021

NOVAS PROPOSTAS PARA O CLUB

 Xa iniciando a recta final, temos novas propostas de lectura para o club. As dúas son banda deseñada: O derradeiro libro de Emma Olsen de Berta Dávila e Subnormal de Fernando LLor e Miguel Porto. Seguro que dan moito que falar.

Se queredes ver a información completa desta xuntanza clicade nesta ligazón ao blog do club Curuxaina.

https://clubdelecturacuruxaina.blogspot.com/2021/05/nova-proposta-banda-desenada.html


luns, 3 de maio de 2021

QUERES APRENDER PORTUGUÉS?

    Pois se queres, na biblioteca poderás atopar libros para aprendelo. Como xa saberedes, este curso pódese estudar a lingua portuguesa como optativa en primeiro de bacharelato. Por iso, mercamos libros para axudar a súa aprendizaxe.


    Tamén recomendamos a lectura deste libro de Gonçalo M. Tavares, no que se nos conta a viaxe de Marius acompañado de Hanna, unha nena con síndrome de Down que busca ao seu pai.


venres, 23 de abril de 2021

INSTRUCIÓNS PARA LER CORRECTAMENTE

Como hoxe é o Día do Libro, queremos achegarvos unhas instrucións que debemos ter en conta para ler correctamente. Unha vez escollida a lectura apropiada, tamén é importante seguir unha serie de pautas para que sexa completamente satisfactoria e que poidamos disfrutar realmente desas marabillosas historias que conteñen os libros.
É o alumnado de 1º de ESO B e E o encargado de facer estas recomendacións. Mirade estes vídeos e xa veredes como vos poderedes transportar a eses fantásticos mundos.
Agradecemos estas propostas creativas das alumnas e alumnos para mellorar a capacidade lectora nun día tan importante para as bibliotecas coma este.
Ademais, na seguinte ligazón podedes ver as nosas recomendacións lectoras http://bibliocastroalobre.blogspot.com/2021/04/dia-do-libro.html
.






O NIÑO DA CURUXA RECOMENDA

O alumnado do Club de lectura O niño da curuxa fixo a súa aportación en prol da lectura recomendando os seus libros preferidos.

Podedes ler a información completa nesta ligazón 

http://clubdelecturacuruxaina.blogspot.com/2021/04/o-club-festexa-o-dia-do-libro.html

Feliz Día do Libro e boas lecturas!


mércores, 21 de abril de 2021

O CLUB SEGUE A SÚA ANDAINA

O venres, 16 de abril, foi a primeira xuntanza do terceiro trimestre do club de lectura “Curuxaina". Comentaron as dúas lecturas: Vampira de blibloteca de Ledicia Costas e 22 segundos de Eva Mejuto.

Ademais, fixeron unha actividade pensando xa no Día do Libro. Máis info nesta ligazón:

 http://clubdelecturacuruxaina.blogspot.com/2021/04/seguimos-andaina.html



mércores, 31 de marzo de 2021

ARTUR PASTORIZA CO NIÑO DA CURUXA

Pechamos trimestre cunha xornada moi especial no Club de lectura O niño da curuxa que, ademais, nos serviu para conmemorar o Día da poesía. Artur Pastoriza, un gran coñecedor da cultura tradicional galega, explicounos a relación entre música e poesía tradicional e animounos a crear coplas populares que acabamos interpretando.

Máis info nesta ligazón http://clubdelecturacuruxaina.blogspot.com/2021/03/artur-pastoriza.html

venres, 12 de marzo de 2021

MULLERES DE LIBRO

 O alumnado de 1º ESO B e E deu a súa visión das personaxes femininas dos libros que lle gustan. Estes son algúns exemplos das portadas que crearon.

xoves, 11 de marzo de 2021

ENTREGA DE PREMIOS

Hoxe entregamos os premios do concurso A través do espello. Unha vez máis, quixemos axudar ao comercio local e, por iso, entregamos bonos para mercar en calquera tenda de Zona Aberta.

Parabéns ao alumnado premiado!!

                        

MULLERES DE LIBRO: MERCEDES E LAURA

 Laura Crussat ou Laura Mulish é a protagonista de Laura no deserto de Antón Riveiro Coello. Hai uns anos esta foi unha das obras seleccionadas para ler no club de lectura, A curuxa sabia. Puidemos seguir a traxectoria vital de Laura, pero tamén de Mercedes Núñez, unha muller excepcional que estivo presa no cárcere de Ventas e, logo, nun campo de concentración nazi. Foi en Mercedes en quen Riveiro Coello se inspirou para crear a personaxe de Laura.

mércores, 10 de marzo de 2021

MULLERES DE LIBRO: IRMINA

Irmina chega a Londres nos anos 30 en busca de traballo, pero as cousas non lle van ben e decide regresar a Alemaña. Alí, buscando o seu benestar, vai aceptando os comportamentos brutais do réxime nazi.

Barbara Yelin, inspirándose na vida  da súa avoa, intenta explicar, nesta novela gráfica, como tantas persoas, que viviron na Alemaña nazi, foron quen de mirar para outro lado e ignorar os crímenes nazis.

Unha lectura para reflexionar.

martes, 9 de marzo de 2021

PREMIOS "A TRAVÉS DO ESPELLO"

Xa temos os premios do concurso A través de espello. O xoves, no recreo, faremos a entrega dos bonos na biblioteca.

1º premio. As dúas Marías, Yaiza Domínguez Abilleira (2º de bac. C) e Laura Quintáns Doval (2º de bac. B)   .

2º premio. A moza da perla (Vermeer), Iván Pereira Nieto (4º ESO A).

3º premio. Amelia Earhart, Eirin Rey Ageitos (1º ESO A). 

4º premio. Betty, a fea, Virginia Cespón Mondragón (1º ESO B).


5º premio. Hedy Lamarr, Natalia Rey Loroño (1º de bacharelato A).