BIBLIOLIMPIADAS DEPORTIVAS

POR FIN, AS BIBLIOLIMPIADAS

O venres 29 de abril celebramos, por fin, as Bibliolimpiadas deportivas. Cun sol espléndido e moita animación comezou o desfile de todos os grupos participantes ( 1º, 2º, 3º e 4º ESO e 1º de bacharelato), precedido polo “comité organizador” (Equipo de Dinamización da Biblioteca, departamento de Educación Física e, como non, @s tres voluntari@s da biblio).

Despois do discurso de apertura, chegou un dos momentos máis esperados, o acendido do pebetero a cargo de Marga, Iago e Alberto (@s profes de Educación Física).

Toda a cerimonia estivo acompañada polo “himno bibliolímpico”, unha creación de 3º ESO A, dirixida polo profesor de Música, David Regueiro.

Comezaron, entón, as probas deportivas. Os distintos niveis competían entre si nas seguintes disciplinas: salto de altura, salto de lonxitude, lanzamento de xabalina, lanzamento de peso e varias modalidades de carreiras. Houbo momentos moi emocionantes. Os atletas e as atletas loitaban pola vitoria da súa clase, facendo un marabilloso traballo en equipo. O verdadeiro espíritu bibliolímpico!

Para rematar a xornada, chegaron os podios. O alcalde de Vilagarcía, Alberto Varela, e a concelleira de urbanismo, Paola Mochales, entregaron as medallas aos grupos gañadores:

- medalla de ouro: 4º ESO A

- medalla de prata: 3º ESO C

- medalla de bronce: 2º ESO B

Queremos facer unha mención especial a 1º de bacharelato C porque, aínda que non acadou unha medalla, si que é un grupo gañador polo seu entusiasmo, pola súa participación, polo seu traballo en equipo, polas súas vitorias e, sobre todo, polo seu espíritu olímpico.

Por último, temos que agradecer ao Equipo directivo o seu apoio por permitirnos levar a cabo este proxecto, ao Departamento de Educación Física a súa implicación no deseño e dirección das probas deportivas, aos titores e titoras a súa axuda para que o alumnado poidese elaborar as bandeiras e os distintivos das camisetas e, por suposto, agradecemos a todo o profesorado a súa colaboración neste día de celebración das Bibliolimpiadas.

CELEBRAMOS AS BIBLIOLIMPIADAS

O FACHO OLÍMPICO: COMEZA A CONTA ATRÁS

O 21 de abril acenderase o facho olímpico en Olimpia. Este ritual, recordando os Xogos olímpicos da Antigüidade, é o comezo da conta atrás para o inicio dos Xogos de Río 2016. O primeiro portador do facho será o grego Lefteris Petrunias, campión mundial de argolas. Iníciase, así, a carreira  que, a través de Atenas, o levará ata Brasil.

Asemade, comeza tamén para nós a carreira de relevos que, desde 1º ESO A ata 1º de bacharelato D, irá portando o facho por cada unha das aulas ata o día 29, data de celebración das Bibliolimpiadas deportivas.

AS BIBLIOLIMPIADAS: ANTÓN PAZ

Hoxe, o alumnado de 1º de bacharelato tivo un encontro con Antón Paz, promovido polo Equipo de Dinamización da Biblioteca. Este regatista vilagarcián conta no seu haber con importantes títulos como dous Campionatos do Mundo e unha medalla de ouro nos Xogos Olímpicos de Beijing (2008).

Antón Paz contounos o desenvolvemento da regata na que conseguiu o ouro olímpico, acompañando a súa explicación cun vídeo da mesma. Falounos da súa faceta como deportista e, tamén, nos achegou ao mundo da vela, constatando os sacrificios que se han de facer na competición de alto nivel.

Da súa intervención destacariamos dous consellos moi útiles para a nosa mocidade: a importancia do traballo colaborativo para obter bos resultados e a necesidade da implicación persoal en calquera proxecto que se queira realizar.

O encontro con Antón Paz, interesante e ameno, culminou cun detalle que agradecemos e que entusiasmou ao alumnado asistente: todos e todas puideron ter nas súas mans as medallas conseguidas por este gran deportista, incluida a olímpica.

Grazas, Antón, pola túa xenerosidade.

BIBLIOLIMPIADAS

AS BIBLIOLIMPIADAS DO IES CASTRO ALOBRE

BIBLIOLIMPIADAS: "ADIVIÑA QUEN SON"

Xa tedes aquí a segunda proba. A carreira non fixo máis que empezar e estades a facelo moi ben. Quen será o atleta ou a atleta máis rápido/a esta vez? O tempo empeza a contar xa. Non vos despistedes e non esquezades poñer o alcume olímpico e todos os vosos datos na folla de entrega da proba. 

Moitas grazas pola vosa participación e lembrade: AS PUNTUACIÓNS PUBLICARANSE O LUNS NA META SITUADA NA PAREDE ENFRONTE Á BIBLIOTECA.

Boa sorte a todos e todas.

Podes descargar o ficheiro aquí:
https://drive.google.com/file/d/0B72EEzU63Ik4aENJVGxDRHBtUUk/view?usp=sharing

BIBLIOLIMPIADAS: SOPA DE LETRAS

Comezamos a carreira coa proba nº 1, unha "Sopa de letras olímpica". O último día de entrega é o xoves 18 de febreiro. As puntuacións dos participantes publicaranse o luns 22 no taboleiro situado na meta (enfronte á Biblioteca).

Situádevos na liña de saída e participade.

Podedes descargar o ficheiro aquí:
https://drive.google.com/file/d/0B72EEzU63Ik4N1Zvd0E4MW5DdkE/view?usp=sharing

AS BIBLIOLIMPIADAS

Presentamos o concurso BIBLIOLIMPIADAS. Na pista de atletismo, que empeza no vestíbulo do edificio da ESO, dará comezo esta competición olímpica á que todos e todas estades invitados a participar. Todos os venres anunciaremos as probas nesta pista, mentres os participantes van avanzando cara a meta.

Aquí vos deixamos as bases e, para calquera dúbida, acudide á Biblioteca, lugar de recollida e entrega de cada unha das probas.

ANIMÁDEVOS A PARTICIPAR!