BO NADAL

 O alumnado de 1º ESO B e E quere felicitarvos o Nadal e, ao mesmo tempo, facer unhas recomendacións lectoras. Pasade o rato por riba de cada nome e poderedes ver a súa postal.

DEBUXANTES PREMIADOS

 O martes 22 entregamos os premios do concurso Crea o teu Fan Art. O alumnado participante amosou as súas dotes artísticas. Aquí tedes a entrega de premios e unha selección dos traballos premiados.

DERRADEIRO ADEUS, MARINA MONTENEGRO

Marina Montenegro Jamargo, alumna de 4º ESO I do noso instituto, vén de recoller o 2º premio do III Certame de Poesía Torre de Caldaloba convocado polo Concello de Cospeito e a Asociación Recreativa Cultural San Martiño de Pino en colaboración con Culturalia GZ.

A súa poesía, Derradeiro adeus, é "un poemario con versos sinxelos, tratándose dunha poesía realista, mais cunha carga emocional que esperta as emocións e a empatía cara á persoa autora. Hai tema presente en todos os versos que son a dor e a tristura que provoca un adeus. Cando amamos de verdade, ninguén está vacinado nin hai a apócema para unha despedida." (extraído de Culturalia GZ)

Nesta presentación podedes ler a poesía e visitar as ligazóns que se fixeron eco da noticia.

Parabéns, María. Este merecido premio por unha poesía tan fermosa é un orgullo para o noso centro.

"NARRACIÓNS VISUAIS" INCLUSIVAS

O 10 de decembro conmemórase o Día Internacional dos Dereitos Humanos. Este ano queremos darvos a coñecer a Robin Hammond, un fotógrafo australiano e fundador de Witness Change, unha organización que promove os dereitos humanos a través da narración visual.

Recomendamos visitar a súa web para ver e ler esas marabillosas e emotivas narracións visuais nas que denuncia:

• a discriminación que sofre a comunidade LGTBQI+ no seu traballo Where love is illegal
• as condicións das persoas con trastornos neurolóxicos en In my world

Recomendamos, tamén, a visualización do vídeo Condemned sobre as enfermidades mentais en África.   

 

E TI TAMÉN LES?

Nesta presentación podedes atopar libros que xa tiñamos e libros novos. Aínda que a biblioteca está pechada como espazo para "estar", está aberta para solicitar libros. Non deixedes de ler!

                                                                 Para ver as lecturas fai clic aquí

A DISCAPACIDADE NA ANTIGA GRECIA I

Un achegamento a Homero e os aedos, a Edipo e Tiresias e aos trastornos psíquicos na mitoloxía. Unha invitación a profundizar neste tema.

A DISCAPACIDADE NA ANTIGA GRECIA II

A deformidade como castigo, beleza vs. fealdade, os trastornos psíquicos e personaxes históricos é o percorrido doutro grupiño de alumnas de grego que investigou sobre a discapacidade na Antiga Grecia.

A DISCAPACIDADE NA ANTIGA GRECIA III

Hefesto, Medusa, Escila ou Caribdis son exemplos de como se tratou o tema da discapacidade na Antiga Grecia. Este é o traballo do alumnado de grego.

CREA O TEU FAN ART

Gústache a banda deseñada? Tes un personaxe favorito? Pois este é o teu CONCURSO. Danos a túa visión dun personaxe de cómic que che guste con ese debuxo tan especial que moitas veces tes imaxinado.

O prazo remata o 13 de decembro. Podes entregalo na biblioteca dentro dun sobre co teu nome, apelidos e curso ou envialo ao correo bibliocastroalobre@gmail.com, tamén indicando os teus datos.

Os premios a repartir son estes:

• Un lote de cómics para o mellor debuxo.
• Tres lotes de láminas de temática manga.
• Un par de grapados de X-Men e Spiderman.
• Dúas láminas de Batman. 

Seleccionaranse varios debuxos para repartir os agasallos que cede a Librería Metrópolis.

O NIÑO DA CURUXA COMEZA A VOAR

Este venres foi a primeira reunión do Club de lectura. Falouse de cómics: Engurras e A mansión dos Pampín. Podedes ver a entrada no blog do Club.

http://clubdelecturacuruxaina.blogspot.com/2020/11/o-nino-da-curuxa-comeza-voar.html

UNHA OLLADA VIOLETA

 Hoxe entregamos os premios ao alumnado gañador do concurso "Unha ollada violeta".  Realmente tivemos fotos moi boas e queremos agradecer a vosa  participación. Especialmente os nosos parabéns a Natalia, Felipe e Eduardo. Co seu premio de 100, 80 e 50 euros poderán mercar en calquera dos comercios asociados a Zona Aberta.

Felipe (2º premio) e Natalia (1º premio)

Eduardo (3º premio)

As fotos gañadoras son estas:

1º Premio. Natalia Rey Loroño 1º bach. A

2º Premio. Felipe Sbiha 1º ESO E

3º Premio. Eduardo Hope 2º bac. A

E estas son algunhas das fotos presentadas a concurso. Para ver todas as fotos fai clic.

O ALUMNADO CONTRA A VIOLENCIA MACHISTA

Hoxe o alumnado do noso instituto manifestou o seu rexeitamento á violencia machista coa lectura dun manifesto e debuxos contra a violencia. Esta é unha pequena mostra da súa visión.

Tiago Vence 1º ESO E

Laura Lago 1º ESO E

Nerea Dos Anjos 1º ESO E

Irene García 1º ESO E

Elif Aydeniz 1º ESO E

 

E este é o manifesto que se leu nas clases despois de gardar un minuto de silencio en recordo de todas as vítimas.

No ano 1999 a Asamblea Xeral das Nacións Unidas declarou o 25 de novembro como Día Internacional da eliminación da violencia machista contra a muller, considerada esta como “todo acto de violencia baseado na pertenza ao sexo femenino que teña ou poda ter como resultado un dano ou sufrimento físico, sexual ou psicolóxico para a muller, así como as ameazas de tales actos, a coacción ou privación arbitraria da liberdade, tanto se se produce na vida pública ou privada”.

 No que levamos de ano, 38 mulleres foron asasinadas polas súas parellas ou exparellas homes, máis de 700 sufriron acoso sexual, máis de 6600 sufriron agresións sexuais e  7350 sufriron abusos sexuais. Desde o 2003, 1073 mulleres foron asasinadas, só polo simple feito de ser muller e porque un home creuse superior a elas.

A violencia contra as mulleres é unha das máis degradantes violacións dos dereitos humanos. Non respecta fronteiras, culturas, niveis económicos ou idades. Está presente en épocas de conflito e en tempos de paz, no fogar, no traballo e na rúa.

O 25 de novembro é un día no que a sociedade, a nivel mundial, manifesta a dor causada pola violencia. Non só a física, a visible, tamén a invisible e silenciosa, a que é vertixinosamente común.

 Pensade que querer non é controlar o móbil, non é dicir o que ten que poñerse a túa moza, non é xulgar nin rir dos seus sentimentos, non é ter celos porque fale con alguén, non é obrigala a manter relacións sexuais senón quere, porque “non é non”. Non é desprezar, insultar, faltar ao respecto, pegar. Iso non te identifica como home. Non hai nada máis perigoso que un home cruel, finxindo ser boa persoa.

 Pensade que ser muller non é sinónimo de ter medo, non é sinónimo de chamar ás túas amigas de camiño a casa polo que podería pasar, non é sinónimo de sentirte observada se levas unha saia curta, non é ser fráxil, dócil, recatada...

 É sinónimo de ser forte, intelixente, valente, líder, independente, de ser unha mesma e de poder traballar no que queiras, de ter as mesmas oportunidades que un home. Ten que ser sinónimo de ser feliz porque non tes medo.

 A violencia machista desaparecerá cando maltratadores, violadores e asasinos sexan xulgados e castigados polos seus feitos.  Desaparecerá cando teñamos unha verdadeira educación non sexista e as nenas e nenos teñan un presente e un futuro coas mesmas posibilidades. Desaparecerá cando entendamos que isto non é unha guerra entre homes e mulleres, isto é unha cuestión de respecto, de concienciarse de que a liberdade das mulleres é un dereito, non unha opción.

 Necesitamos que este sexa un mundo seguro para todas as persoas independentemente do seu sexo. Necesitamos que as presentes e futuras xeracións sexan educadas en igualdade, respecto e valores para conseguir que a sociedade mellore. Necesitamos que o reparto de deberes e obrigas, así como de dereitos sexa igualitario en todos os eidos da vida.  Necesitamos que se conseguimos chegar a cumprir estas esixencias, estean vixentes todo o ano, non só este 25 N.

 Este ano, probablemente as mulleres que saian á rúa a reivindicarse non serán tantas coma nos anos pasados, pero iso non quere dicir que a nosa voz non se vaia escoitar. Agora que non nos podemos xuntar, temos que permanecer máis unidas e unidos que nunca nesta loita. Debemos ser inflexibles nesta batalla, o compromiso con esta causa non pode desaparecer ata a súa total eliminación. Temos que loitar por cada unha das mulleres que asasinaron, para que ningunha de nós quede calada por culpa dun home que lle quite a voz.

 Hoxe, 25 de novembro, defendemos a nosa  esperanza e mantemos o noso compromiso durante cada día do ano. Desde o IES Castro Alobre queremos dicir, ben alto, que loitaremos pola igualdade até que todas, todos, todes sexamos libres!

 -----------------------------------------------------------------------------------------------------------------------------------

Texto:

Mario Arufe, Daniel Berdullas, Andrea Cortés, Miguel Diz, Diego Gómez, Nouhaila Halliou, Marta Martínez, Noelia Molares, Natalia Mouriño, Aroa Muras, Natalia Rey, José Romero, Uxía dos Santos e Clara Senín.

A BIBLIOTECA CONTRA A VIOLENCIA MACHISTA

 

O 25 de novembro non queremos esquecernos de todas as mulleres que sofren a violencia machista. Variadas son as actividades que se realizarán no noso centro como variadas son as formas de violencia contra as mulleres. Rexeitamos todo tipo de violencia e animamos a seguir adiante con esta loita.

Como mostra, as palabras do alumnado de 4º F que, en forma de rap, condean a violencia machista. Grazas aos alumnos e alumnas por este traballo e, como non, a Leo, o seu titor.

CIENCIA EN GALEGO

O mes de novembro está adicado nas bibliotecas á ciencia; por iso queremos destacar algúns dos científicos e científicas galegas. Tamén, como non, recomendar algunhas lecturas e dar a coñecer os nomes normalizados das constelacións que, non hai moitos días, aprobou a Real Academia Galega.

Podedes acceder á presentación en pdf nesta ligazón https://drive.google.com/file/d/1dMxz8TvZ-lH1OY8p7IsW3rcWdwT0AS5J/view?usp=sharing

CLUB DE LECTURA

Iniciamos a viaxe lectora cun grupiño de alumnado de 1º e 2º da ESO. Este curso é moi diferente a todo o que levamos vivido e, por iso, tamén o Club vai ser distinto. Tivemos que renunciar ao entrañable Club de Lectura inclusiva, xa que a situación sanitaria non nos permite as reunións presenciais, xusto o que necesitan as persoas integrantes do mesmo. Esperaremos ao vindeiro curso para darlle continuidade. Mentras tanto, Raquel, a coordinadora do Club e profe do Departamento de galego, xa se reuniu este venres con alumnos e alumnas para comentarlles as primeiras lecturas e pór data para a seguinte reunión. 

Agradecemos a Raquel a súa boa disposición para levar adiante este proxecto nuns momentos tan complicados.

Desde a biblioteca escolar seguimos fomentando a lectura.

MAPA PROXECTOS "SELLO CCB"

A Comisión Permanente do CCB publicou na súa web un mapa interactivo dos gañadores e finalistas do Selo CCB. A nosa biblioteca aparece como gañadora do ano 2018 co seu proxecto Rescatando culturas (podedes consultado aquí).

Máis info: https://www.ccbiblio.es/mapa-interactivo-para-el-sello-ccb/

DÍA DAS LIBRERÍAS

Hoxe, 13 de novembro é o Día das Librerías. Esta data, que se celebrou por primeira vez no 2011, promovida por CEGAL e a Dirección Xeral do Libro e Fomento da Lectura do Ministerio de Cultura e Deporte, conta co apoio da Federación de Librarías de Galicia.

Este ano, máis que nunca, necesitan o apoio de todos e todas nós; por iso, desde a biblioteca, queremos reivindicar a necesidade de mercar no comercio local. 

As librerías son espazos absolutamente imprescindibles para fomentar a lectura, para estimular a creatividade e a imaxinación, para darnos a coñecer o mundo, para promover a cultura, para atoparnos con escritores e escritoras; en definitiva, espazos para compartir lecturas desde a proximidade e o coñecemento.

Axudemos a que continúen abertas. Axudemos as nosas librerías. Merquemos en Vilagarcía.

Agradecementos a Follas Novas, Librería Nobel, Metrópolis e Librería Vidal por aceptar a proposta de achegar as súas librerías a este blog.

A BIBLIOTECA COA LIBRERÍA VIDAL

O Día das Librerías é un bo momento para que sexan precisamente estes espazos, os que nos axuden a fomentar a lectura. Grazas á Librería Vidal por colaborar con nós nesta iniciativa e, por suposto, pola súa amabilidade e atención.

Desde a biblioteca lembramos a importancia de mercar no comercio local.

A BIBLIOTECA CON FOLLAS NOVAS

 No Día das Librerías todo o noso apoio ao comercio local. Que mellor que deixarse asesorar polas  libreiras e libreiros cando dubidamos na elección dun libro?

O noso agradecemento a Follas Novas por aceptar a proposta de fomentar a lectura e animar a comprar libros na nosa vila desde este blog. Deixamos as palabras que nos achegaron e que comezan así:

"Tentemos que non pechen para que non anoiteza antes de tempo...A mellor maneira de axudar a que non suceda é ler, mercar e compartir libros".

Podedes seguila en facebook https://es-es.facebook.com/follasnovasarousa

A BIBLIOTECA CON METRÓPOLIS COMICS

Unha oferta diferente é a que nos ofrece Metrópolis Comics. Para as persoas amantes da banda deseñada todo un luxo.

Nuns días teredes algunha sorpresiña da que vos iremos informando.

Grazas a Metrópolis por fomentar a lectura nun formato diferente e pasade por alí para ver estes extraordinarios libros.

Gustaravos!!!

A BIBLIOTECA COA LIBRERÍA NOBEL

Apoiando ao comercio local, hoxe nos acordamos das librerías, uns espazos que nos axudan a pensar, a ler, a imaxinar...

Desde a Librería Nobel nos achegan esta proposta:

"Mañá venres día 13 de novembro, festexa con nós o Día das Librerías. É tempo de agradecer o teu compromiso co pequeno comercio, así que poderás beneficiarte dun 5% de desconto en todas as túas compras de libros (agás os libros de texto).

E, ademais, estate atent@ as nosas redes sociais porque haberá máis sorpresas...

https://es-la.facebook.com/librerianobelarousa/

Agardámoste!!

A BIBLIOTECA E A IMAXINACIÓN

Presentamos, aínda que con un pouco de retraso (esta entrada deberíase ter publicado o Día das Bibliotecas), unha pequena selección de relatos e debuxos do alumnado de 1º ESO B e E. O tema, A Biblioteca víctima da COVID-19. 

Estas historias forman parte dun traballo realizado na materia de Lingua Castelá e Literatura. Alumnas e alumnos demostraron as súas dotes creativas e, por iso, debemos felicitalos.

Parabéns!

La Biblioteca víctima de la COVID-19 de Biblioteca Castro Alobre

AS MATEMÁTICAS TAMÉN "SUMAN"

    O Departamento de Matemáticas vén de enviarnos un vídeo coa recompilación dos traballos feitos polo seu alumnado o curso pasado dentro do PDI Tod@s sumamos. Como xa sabemos, a vida académica paralizouse por mor da COVID-19 e tantas e tan boas creacións dos nosos mozos e mozas quedaron ser expoñer.

    Agradecemos ao Departamento de Matemáticas a súa implicación nas propostas da biblioteca e, por suposto, este magnífico traballo que estamos encantadas de compartir neste blog.

    Parabéns a todo o alumnado participante!

RICARDO CARVALHO CALERO

O 17 de maio debía celebrarse coma todos os anos o Día das Letras Galegas, adicado a Ricardo Carvalho Calero. Por mor da COVID-19, adiouse a súa celebración ao 31 de outubro. 

Tras coñecerse o peche perimetral das sete cidades galegas polo agravamento da situación sanitaria, a RAG decidiu non celebrar, por segunda vez, o pleno extraordinario no que sería evocado o legado do escritor.

Non obstante, a biblioteca si que debe e quere lembrar de novo a Carvalho Calero e, para iso, ofrecemos as seguintes ligazóns a recursos online para homenaxealo como se merece:

- Portal da lingua galega

- Carvalho Calero 2020, impulsada por Agal en colaboración coa Secretaría Xeral de Política Lingüística

- carballocaleroenlugo.org, feita polo Colectivo Egeria en colaboración coa Consellería de Cultura e Turismo e do Colexio de Fingoi

- Portal institucional da  RAG 

Ademais, clicando aquí, podedes atopar unha serie de caricaturas de Carvalho Calero elaboradas por Siro.

MELLORES BLOGSPOT DE BIBLIOTECAS ESCOLARES

    Queremos agradecer a Eva Vilches, administradora de  sooluciona.com, a inclusión do blog da nosa biblioteca na selección que fixo dos mellores Blogspot de bibliotecas escolares 2020.

    Podedes consultar a súa listaxe nesta ligazón https://sooluciona.com/los-mejores-blogspot-de-bibliotecas-escolares-de-2020/.

UNHA OLLADA VIOLETA

    A biblioteca convoca o concurso fotográfico Unha ollada violeta. Poderá participar todo o alumnado do centro. Entre as fotos que enviedes ao correo da biblio bibliocastroalobre@gmail.com, seleccionaremos as tres mellores. O premio consistirá en vales para mercar en calquera dos comercios de Vilagarcía adscritos a Zona Aberta:

                        1º premio: 100€

                            2º premio: 80€

                                3º premio: 50€

     Tedes de prazo ata o 22 de novembro. Podedes ver aquí o cartel anunciador e as bases. 

Día das Bibliotecas

    O 24 de outubro celébrase o Día das Bibliotecas. Este curso preséntase realmente difícil, pero non por iso nos imos desanimar. Trataremos de levar á comunidade educativa propostas de lecturas, utilizando este blog como canle de comunicación; tamén, intentaremos achegarvos as creacións do noso alumnado, un xeito diferente de participar nas actividades da biblioteca.

    Botamos de menos a eses mozos e mozas que viñan buscar libros, que viñan a ler, a estudar ou a participar nos nosos concursos. 

    Tiñamos unha biblioteca con vida, con moita vida, e é iso o que queremos lembrar neste Día das Bibliotecas. 

    Porque non deixaremos que este virus faga esquecer a Biblio Castro Alobre, esta é A nosa biblioteca: así era e así seguirá sendo.

A LOITA COTIÁ DAS MULLERES POR ESTAREN AÍ

O 19 de outubro celébrase o Día das Escritoras. Como en anos anteriores sumámonos á iniciativa da Biblioteca Nacional de España, que organiza en colaboración coa Federación Española de Mujeres Directivas, Ejecutivas, Profesionales y Empresarias (FEDEPE) e coa Asociación Clásicas y Modernas. O seu obxectivo é "reivindicar la labor y el legado de las escritoras a lo largo de la historia".

Este ano a comisaria Elvira Lindo selecciona textos que nos van falar do esforzo cotiá das mulleres. Intentaremos transmitir ao noso alumnado os pensamentos e sentimentos destas escritoras. 

Ademais, este ano, temos unha colaboración moi especial para conmemorar este día. Queremos agradecer ao profesorado do Departamento de Galego do noso centro a escolla de textos de escritoras en lingua galega e portuguesa, para achegarllos ao noso alumnado. Unha Hora de Ler interesante e variada.

Escritoras en lingua galega👉https://www.canva.com/design/DAEKVd_vsaE/jvpgTY4-N83xZQK2-eXBDA/view?presentation

Escritoras en lingua portuguesa 👉 https://www.canva.com/design/DAEKB94M3qY/ViiBKGoRENfalMUZLIl7YA/view?presentation#5

COMEZAMOS O PRÉSTAMO

 

QUE FAREMOS NA BIBLIOTECA SEN BIBLIOTECA?

Este curso preséntase especialmente duro e moi diferente para alumnado e profesorado. Debemos acostumbrarnos a unha serie de normas tan estrañas como necesarias: non compartades, non traballedes en grupo, non fagades deportes de contacto... A pantasma da COVID 19 está rondando e é, realmente, un asunto moi serio.

Tamén a biblioteca escolar se verá afectada polo virus. No noso caso quedamos sen biblioteca. Xa non haberá ese espazo de encontro, de lectura, de estudo, do cal estabamos tan orgullosos e orgullosas. Soarán prohibicións continuas: non toquedes os libros, non collades películas, non veñades con compañía a solicitar os préstamos e, mellor, se non vides; sempre temos un correo electrónico para axudarvos. 

É unha mágoa, pero ten que ser. 

A biblioteca pecha e se converte en aula. É necesario acoller a trinta alumnos e alumnas, que se verán rodeados de libros. Libros que será difícil prestar, porque non podemos expoñer nos diversos espazos lectores que tiñamos e desapareceron. Totalmente necesario, de novo. 

Pero a pregunta é, como imos dinamizar unha biblioteca sen biblioteca?

Quédanos o blog, pero sabemos que así é moi difícil mover ao alumnado. O meu ánimo como coordinadora da biblioteca está moi baixo. Doe poñer carteis de "Non tocar". Como faremos a xestión da biblioteca? Preguntas aínda sen resposta.

De momento, "o papeleo", o Protocolo da biblioteca que podedes consultar aquí https://drive.google.com/file/d/16h3qYDpvMR22djhN8UJ14B_RjA1GmJVu/view?usp=sharing

De xeito resumido e máis dinámico este vídeo

"CADA LIBRO TIENE ALMA..."

Recordando a Carlos Ruíz Zafón. Sempre unha boa recomendación de lectura para o verán.

LECTURAS INCLUSIVAS PARA O VERÁN

UN PROXECTO EN COMÚN

Queremos presentarvos ese libro do que falamos en anteriores entradas. Un libro moi, moi especial como especiales son todas as persoas que o fixeron. É un proxecto en común, porque en común len, ou mellor dito, leron libros. Nesas xuntanzas dos xoves na nosa biblioteca (tamén no cole veciño, por certo, nunha sesión de cine) imos afondando nas historias, nos personaxes e, tamén, na tolerancia, na aceptación, no respecto. Isto é o que fai grande o noso club, porque Todos e Todas sumamos.

Ver o libro aquí

DOS HEROÍNAS CONTRA EL CORONAVIRUS

Carlota Magán Cascallar de 1º ESO A achegounos este bonito relato no que as protagonistas Ana e Ana Frank loitan contra o coronavirus. Unha preciosa historia que paga a pena ler.

Parabéns, Carlota!

Dos Heroínas Contra El Coronavirus

LETRAS GALEGAS 2020

O 17 de maio celébrase o Día das Letras Galegas e, aínda que nunha situación realmente especial, non queremos esquecer a Ricardo Carvalho Calero, escritor a quen se lle adica este día.

Ofrecemos as seguintes ligazóns a recursos online para homenaxealo como se merece:

- Portal da lingua galega

- Carvalho Calero 2020, impulsada por Agal en colaboración coa Secretaría Xeral de Política Lingüística

- carballocaleroenlugo.org, feita polo Colectivo Egeria en colaboración coa Consellería de Cultura e Turismo e do Colexio de Fingoi

- Portal institucional da  RAG 

Ademais, clicando aquí, podedes atopar unha serie de caricaturas de Carvalho Calero elaboradas por Siro.

CONTRIBUÍNDO Á EDUCACIÓN

Despois de tantos días con malas novas, recibimos unha noticia esperanzadora. Recordaredes que o Día Internacional contra o Uso de Menores Soldado todo un experto no tema, Chema Caballero, estivo no noso instituto para dar a coñecer a situación dos nenos e nenas soldado. Todo un privilexio. Pois ben, recibimos un correo da ONG DYES (Desarrollo y Educación Solidaria), http://ongdyes.es/,  coa boa nova de que grazas á aportación da biblioteca (entre outras) por mor da charla anteriormente citada, tres xóvenes de Serra Leoa se puideron graduar na universidade.

É todo un orgullo para a nosa biblioteca seguir colaborando con proxectos solidarios.

Timothy S. Conteh

Samuel Samura

Daniel Kadalie Kamara

LER E RELER

 

UN DÍA DO LIBRO DIFERENTE

A nosa vida está medio parada ou, polo menos, separada desa mocidade lectora e da que non o é tanto, porque xa sabemos que, por moito que nos empeñemos, a moito do noso alumnado lle custa ler. 

Certamente, este blog sufriu un parón importante. Deixou de ter vida desde o momento no que nos tivemos que quedar na casa. Podiamos empeñarnos en recomendar libros ou podiamos involucrarnos nesa febre momentánea que non paraba de mandar ligazóns e ligazóns a todas partes como senón tivésemos unha preocupación maior. 

O noso alumnado podía ler libros gratuitos en diversas plataformas, podía visitar museos virtuais, podía participar nun feixe de concursos que lle podiamos presentar, podía, podía..., podía facer de todo e máis se houbese. O problema é que nos esqueciamos do máis importante. Como estaban esos mozos e mozas? Realmente a maioría estaba pensando en consumir toda esa oferta que se lle facía desde mil e unha bibliotecas e outros espazos? Preguntado como estaba un pequeno grupo do que teño o orgullo de ser profesora, a resposta foi unánime. Estes eran os seus sentimentos:

    tristura                                 agobio                             estrés                            enfado                             desánimo                            aburrimento                   ansiedade                     desesperación

Son amante dos libros, son amante das bibliotecas, pero os meus esforzos tiñan moi claro o seu destino, tratar de manterme en contacto con esta xuventude, intentar que me falasen. Desexo nada fácil. Non vía e non vexo as súas caras e temo, nalgún momento, a súa desconexión. Non son lectores nin lectoras, non lles gusta ler. Formaban parte dun Club de Lectura Inclusiva, un grupo marabilloso de xente reunida entorno a un libro. Estaban aí, porque eu os acompañaba e os guiaba Pero agora, que lecturas lles vou ofertar se necesitan acompañamento, se necesitan forzas para seguir adiante? Non teño a resposta pero, mentras isto ocorre en moitos hogares da nosa vila, hoxe, 23 de abril, celébrase o Día do Libro. A vida segue e seguimos pensando o mesmo, os libros son uns bos compañeiros de viaxe pero, para iso, tenos que gustar ler.

Este é o seu traballo.
Guadalupe Vilar, coordinadora da biblioteca

l

É como é o Día do Libro,este é o díptico para conmemoralo.

E un vídeo da biblioteca pública Almodi da Rede de Bibliotecas Municipais de Llíria (Valencia) que recibiu o premio "Biblioteca pública y compromiso social" (2019) polo seu proxecto "Biblioteca fácil", todo un exemplo a seguir.

Por último, unha viaxe polas 11 bibliotecas máis impresionantes do mundo. Deixamos para outro día as recomendacións lectoras. Supoño que saberedes comprendelo. Moitas grazas aos lectores e lectoras deste blog por acompañarnos nestes tempos difíciles e noutros mellores que, sen dúbida, virán.

TECENDO REDES...

NOVA XUNTANZA, NOVA LECTURA

Despois dun mes de febreiro adicado á poesía no que lemos a Fran Alonso,

 

Sandra, a monitora do Centro con Eles, sorprendeunos coa próxima lectura. Nada máis e nada menos que A Celestina, un auténtico clásico! E para introducir este libro, falounos de Fernando de Rojas e de Calisto, Melibea e, por suposto, da "alcahueta" Celestina, palabra que espertou as risas da rapazada. Seguro que aprenderemos moito con este libro. Esperemos que lles guste!

 

DÍA DE ROSALÍA

Para conmemorar o Día de Rosalía, o Concello promoveu unha actividade na que o músico Dani Barreiro achegou a vida e obra da poetisa, utilizando a música como canle de expresión. A biblioteca acolleu a historia musicada de Rosalía.

LECTURA FÁCIL

O luns 17 de febreiro algunhas das persoas que formamos o club de lectura Curuxaina combinamos para comentar a primeira das lecturas deste curso, a  novela de Cristina Morales Lectura fácil .

A obra escollida para esta primeira xuntanza do ano non deixou indiferente a ninguén e foron moitos os aspectos sobre os que debatemos como, por exemplo, a visión das distintas discapacidades das protagonistas, os límites de certos sistemas (xudicial, político, administrativo, etc.), a multiplicidade de técnicas narrativas empregadas, o humor que transloce nalgún dos discursos ou o uso da linguaxe na conformación das personalidades de cada unha delas.

Ademais, o bo ambiente e as ganas de manter este tipo de iniciativas fixo que acordaramos a seguinte obra e a seguinte xuntanza...vémonos nun mes co Carrusel de Berta Dávila!

Raquel Fernández

REGALA DIVERSIDADE. PREMIOS

Hoxe a biblioteca acolleu a entrega de premios do concurso Regala diversidade, convocado polo Grupo de Diversidades afectivo-sexuais e a Asociación de Comerciantes Zona Aberta. Ao acto, presentado pola coordinadora do grupo, Paloma García, asistiron a directora, a presidenta de Zona Aberta e o xurado, así como alumnado e profesorado do noso centro.

1º premio: Sonia Vázquez

2º premio: Manuel Esperón

3º premio: Eduardo Hope

Queremos dar os nosos parabéns ao alumnado gañador, pero tamén recoñecer a calidade das demais fotos participantes; por iso, publicámolas na seguinte ligazón

 https://photos.app.goo.gl/Ej8SuURKD4Vtc6waA

Se queredes ver a exposición de fotos, visitade a cafetería do instituto. Paga a pena.