DEREITOS HUMANOS

Para conmemorar o Día Internacional dos Dereitos Humanos, o alumnado de 3º PDC elaborou un mural para dar a coñecer o traballo da Unión Europea en prol dos dereitos das persoas.

Parabéns polo voso traballo!

CLUB DE LECTURA

    Facemos reconto das últimas reunións do club, deixando as ligazóns ao blog Curuxaina onde podedes atopar máis detalles e máis fotos dos nosos encontros.

    Palabras con-Ciencia falou de Amigos robots, unha xuntanza que xerou moitos comentarios e moitas preguntas. Realmente animada! 

Para máis info clicade aquí.

    Aire negro e As mans do medo foron as lecturas comentadas entre o alumnado de 3º, 4º e 1º de bacharelato. Coma sempre, opinións moi enriquecedoras (máis info aquí).

    A Curuxa sabia reuniuse arredor de Reencuentro. Que bo momento! (máis info aquí).

   E agora xa estamos coas seguintes lecturas: Los jjuegos del hambre, El curioso incidente del perro a medianoche y Ninguén contará a verdade.

    Bo Nadal para o club coa compañía destas grandes historias.

ENTREGA DE PREMIOS

Entregamos os premios ao alumnado gañador dos Relatos de Terror. Gabriel e Xiana de 1º ESO, Xiana de 2º ESO, Antía de 4º e Elena de 2º de bacharelato pasaron pola biblioteca para recoller un vale agasallo para unha tenda de cómics.

Parabéns para todo o alumnado participante. Houbo un nivel moi alto que nos serviu para coñecer a grandes escritores e escritoras.👏👏👏

Terror en el instituto de Biblioteca Castro Alobre

Pesadelo de Biblioteca Castro Alobre

ICEBERG CONTRA A VIOLENCIA

 Seguimos a recordar o 25 N para dicir BASTA. A biblioteca ofrece lecturas para reflexionar sobre os distintos tipos de violencia: a visible e a invisible. Só se somos plenamente conscientes desta situación, poderemos alzar a nosa voz para acabar con este tipo de violencia.

 Asasinatos, feminicidio, violación, insultos, berros, linguaxe sexista, desprezo, micromachismos..., todo ben visible no iceberg contra a violencia machista da biblioteca.

                                         

E TI QUE CONTAS?

O luns xuntouse o Club de lectura E ti que contas?, na biblioteca do Colexio de Educación Especial. Tocounos falar de Muhammad Ali. Fixemos un percorrido pola súa vida, atendendo especialmente ao empeño que puxo en conseguir os seus soños; tamén, nos gustou a súa loita pola igualdade.

Chegamos á conclusión de que, se realmente queremos conseguir algo, debemos loitar con todas as nosas forzas por conseguilo.

Rematamos a xuntanza coa elaboración dun mural que adornou a biblioteca. Que momentos máis fermosos e especiais vivimos neste Club. E agora a pensar na seguinte lectura. Tamén do mundo do deporte.

CIENCIA EN GALEGO

A Biblioteca quere promover as lecturas científicas. Que temos moitas!!! E, por suposto, tamén en galego. A profe de Física, Cristina, que tamén forma parte do equipo da biblioteca, propúxolle ao seu alumnado de 4º ESO a recreación dalgúns momentos científicos e literarios no laboratorio. 

Esta é algunha mostra que nos serve, tamén, para recomendar libros neste mes da ciencia.

Grazas ao alumnado colaborador e parabéns. Fixestes un traballo precioso.😍😍😍

LIBROXOGO TERRORÍFICO

Busca as pistas e atopa os libros que te recomendamos para ler, se che gusta o terror. Ademais deses, atoparás moitos máis.

LENDO MEDO

 Chegado o Samaín, quixemos recomendar lecturas de medo e nada mellor que ofrecer uns fragmentos acompañados de exposicións dos libros que temos na biblioteca. 

Tamén estes fragmentos se puideron ler na Hora de ler e..., quen sabe... Ao mellor alguén se animou e o escolleu como lectura para pasar momentos terroríficos.

Historias De medo de Biblioteca Castro Alobre

SAMAÍN NO ALOBRE

 Vivimos unha xornada de medo no Castro Alobre que tivo como protagonista ao alumnado do Proxecto Competencial. Visitamos un cemiterio literario, no que puidemos ver as tumbas de Vicente Risco, Eduardo Pondal, María Victoria Moreno, Valentín Paz Andrade, Rosalía de Castro ou Xela Arias entre outros. Tamén, viaxamos a diferentes universos literarios terroríficos. Houbo maquillaxe, un escape room, busca do premio e un photocall no que participou o equipo da biblioteca. 

Todo isto presidido pola Santa
Compaña.

Ademais, queremos recomendar a visualización do vídeo A morte a tod@s iguala nesta ligazón https://youtu.be/vfiso95vcdA?si=gidUVFLvGebLgepn. O alumnado correspondente de 4º ESO cóntanos como se celebra a morte nos seus países de orixe. Realmente interesante.

Parabéns!!!

CLUB DE LECTURA

 Xa tivemos as primeiras xuntanzas do Club de lectura. Repartíronse os libros entre os distintos grupos que temos este ano. Xa comezamos a ler , fixemos unha introdución a Amigos robots, contamos historias de medo , reunímonos co Colexio de educación especial para que o alumnado se coñecese e o profesorado falou de Vémonos mañá de Xosé Monteagudo. 

Clicade nas ligazóns que vos levarán ao blog do Club de lectura. Mentres esperamos as seguintes xuntanzas, invitámosvos a formar parte desta gran comunidade lectora.

DÍA DAS BIBLIOTECAS

Nada mellor que conmemorar o Día das Bibliotecas convidando ao alumnado a coñecer todos os recursos que lle podemos ofrecer, as actividades nas que pode participar e mostrarlle as diferentes seccións e como atopar os libros. Especial atención adicámoslle a 1º ESO por ser o primeiro ano que están no instituto.

                        

TERROR NO INSTITUTO

Atención!!!! 

Xa temos convocado un concurso de medo.  Que pasaría no instituto nun mundo terrorífico paralelo?

Anímate a participar!!!

RADIO NA BIBLIO

 Este curso a Biblioteca solicitou a integración no programa Radio na Biblio. Esperemos que nolo concedan, porque queremos apoiar ao Proxecto Competencial de 3º ESO, dirixido pola profesora Marisa de Lingua galega.

A nosa colaboración está asegurada e iremos integrando alumnado voluntario para participar nos programas. Polo de pronto, convocouse un concurso para buscarlle un nome á radio.

O concurso, que terá como premio 10 euros para gastar na cafetería e a honra de ser o/a autor/a do nome da Radio, estrutúrase en tres fases:

Fase 1: Propostas de nomes (desde o 10 ao 19 de outubro). Poderase participar a través de tres vías:

            -Deixando a túa proposta no buzón colocado na biblioteca.

            - Enviando unha DM ao Instagram de @galegocastroalobre

            - Entregándollo ao alumnado de Proxecto Competencial que pasará polas aulas no día 19 de outubro.

Fase 2: Selección dos 10 mellores nomes

- Realizará esta selección o alumnado de Proxecto Competencial de 2º da ESO.

Fase 3: Escolla do nome da Radio.

Tamén buscamos un logo para a radio. Lede en a convocatoria do concurso.

DÍA DAS ESCRITORAS

Comezamos a Hora de Ler o Día das Escritoras. O equipo da biblioteca propón como lectura a selección de textos da BNE e a selección de textos de escritoras galegas. Son xustamente estes textos os que un grupiño de alumnado de 3º ESO le na biblioteca.

Fomentando a lectura!

OS LIBROS TAMÉN SAEN DO ARMARIO

 Un ano máis celebramos o Día Internacional da Saída do armario, un bo día para que tamén os libros saian dos andeis. O grupo LGTBI+ escenificou esta saída e a biblioteca visibilizou libros desta temática. E seguimos aumentando as lecturas.

VÉN AO CLUB DE LECTURA!

Primeira xuntanza do Club de lectura con novidades importantes. En 1º e 2º ESO, Cristina e Vicky coordinarán o club "Palabras e ciencia"; en 3º, 4º ESO e bacharelato guiarán as lecturas Teresa e Antonio; Paloma e Andrea falarán coa rapazada de "Lecturas diversas" e Lupe reunirá ao seu alumnado de 3º co alumnado do Colexio de Educación Especial nun club de escoita, qué é máis que un club de lectura. Non esquecemos A curuxa sabia, o club do profesorado. Todo isto baixo a supervisión da coordinadora Teresa, profesora do departamento de Lingua castelá.

AGARDÁMOSTE COS LIBROS ABERTOS

 Xa estamos de volta con moitísimas novidades e cun gran equipo que fará todo o posibles para fomentar a lectura, sobre todo, entre a rapazada. Este curso, o Equipo da Biblioteca está formado por:

Teresa, Carlos e Vicky do departamento de Lingua castelá, Antonio, Marisa, Noa e Andrea de Lingua galega, Paloma de Música, Cristina de Física e Lupe, como coordinadora, do departamento de Grego.

Empezamos cunha selección de lecturas para animarvos a ler.😀

La desconocida

Última xuntanza do Club do profesorado. O motivo era comentar as nosas impresións sobre La desconocida de Rosa Montero e Olivier Truc. Coincidimos en que era unha historia entretida e que mantiña o interese da persoa lectora. Como, por motivos varios, eramos moi pouquiñas decidimos volver comentar esta lectura en setembro; por iso, nesta entrada non comentaremos nada máis, para non dar pistas.

LENDO SOBRE BOB DYLAN

Última xuntanza do Club de lectura inclusiva, un club de escoita exemplar no que mozos e mozas se sentiron moi a gusto. Nesta sesión o alumnado encargado de ler foi o de 3º de ESO do noso club. Participaron con moitas ganas. Ademais, contamos con Irene e Fran que se encargaron de presentar as actividades. E tamén con outras alumnas de Oratoria que nos axudaron en todo momento. Encargáronse de recibir aos compañeiros e compañeiras e ás profesoras do cole e de facerlle uns bonitos debuxos nunhas libretiñas de agasallo. 

Agradecemos a participación de todo este alumnado e esperamos que siga a colaborar con nós.

 

Despois da lectura e de escoitar algunha canción de Bob Dylan, fomos ao Salón de actos para ver unha representación teatral dirixida pola coordinadora do Club, Teresa, e interpretada polo alumnado de 2º ESO. Representaron Menuda nochecita e fixérono realmente ben.

E, por último, unha merenda na cafetería para compartir uns momentos de lecer. Só nos queda despedirnos ata o próximo curso que xa comezaremos desde o principio con moita forza.

SEN LÍMITES

 O alumnado de 1º de bacharelato científico na materia de Bioloxía gravou uns podcast dentro do PDI Sen límites. Tratan sobre as discapacidades motoras, o envellecemento celular, os accidentes, a audición, os deportes, a idade e a visión.

Discapacidades motoras

Biblioteca Castro Alobre · ENVELLEVEMENTO CELULAR. Mariña, Paula, Ivaní E Nerea 1ºbachD (1)

Biblioteca Castro Alobre · Podcast Accidentes

Biblioteca Castro Alobre · Podcast Audición

Biblioteca Castro Alobre · Podcast Deporte

Biblioteca Castro Alobre · Podcast Idade

Biblioteca Castro Alobre · Podcast Visión

A CÉLULA

 As vosas creacións forman parte do noso blog. É realmente interesante divulgar o traballo do alumnado, porque sabe facer moitas cousas e moi ben; como exemplo, estas células de 1º ESO na materia de Bioloxía.

HISTORIAS SEN LÍMITES

O alumnado de 2º de ESO A, D e E buscou información sobre persoas coñecidas e anónimas que superaron algún tipo de límite, Despois dunha posta en común, e a partir desta información real, crearon unha personaxe que sería a protagonista dun relato breve.

Uns bonitos libros acordeón contaron a historia dunha persoa que supera algún tipo de obstáculo ou límite. Algúns foron escritos e ilustrados para un público infantil e outros para público xuvenil.

TRES ESCENAS

O departamento de Música co alumnado de Artes escénicas acudiu á biblioteca para desenvolver o Proxecto Documental Integrado "Sen límites". 

ORGULLO LGTBI+

En xuño celebramos o Día do Orgullo LGTBI+. Apoiamos ao Grupo de Diversidade afectivo-sexual que fai un gran esforzo para que o respecto e a igualdade cheguen a ser unha realidade. Temos a obriga de traballar con este grupo de alumnado e profesorado para defender os seus dereitos, que son os dereitos que toda persoa debe ter. 

 Desde a biblioteca recomendamos lecturas moi interesantes.