martes, 30 de outubro de 2018

ARRINCA UNHA NOVA EDICIÓN DO EpDLab

No post anterior falabamos do primeiro obradoiro no que 3º PMAR iniciaba a súa andaina en EpDLab, un proxecto, como diciamos, moi interesante, motivador e formativo.

Agora Agareso (Asociación Galega de Reporteiros Solidarios) publica na súa web os inicios desta nova etapa. "A nosa idea inicial foi traballar na reflexión sobre a desigualdade social dende unha perspectiva mediática... A partir de metodoloxías de acción-investigación, desenvolvemos esta tarefa usando apps, ferramentas de creación dixital e contidos dos medios de comunicación; en paralelo, traballamos a alfabetización mediática, o pensamento crítico, a comunicación inclusiva e a creatividade, co obxectivo principal de formar á cidadanía do futuro na denuncia da desigualdade, na loita pola xustiza social e na participación activa."

Invitámosvos a coñecer esta proposta e o traballo do alumnado nas súas webs.


venres, 26 de outubro de 2018

AVANZANDO CARA A IGUALDADE COAS NOVAS TECNOLOXÍAS


Hoxe comezamos a andaina no EpDLAB. Un proxecto novo, non para o instituto (que xa participou o curso pasado) , pero si para nós. EpDLAB é un proxecto de Educación para o Desenvolvemento promovido por Agareso (Asociación Galega de Reporteiros Solidarios) no que están implicados 5 IES de Galicia. O seu obxectivo é "promover a reflexión colectiva sobre a desigualdade social dende unha perspectiva mediática, así como fomentar o pensamento crítico e motivar a expresividade e a responsabilidade no uso das redes sociais."

Van ser once os alumnos e alumnas, de 3º PMAR, que se van beneficiar deste proxecto. Hoxe coñeceron a Roi e participaron nas tarefas que lles ía presentando. Faloulles de sexismo e roles de xénero nos medios. Tema moi interesante e necesario para a formación da nosa rapazada, no que o noso centro, como sabedes, ten xa un longo camiño percorrido. Esta actividade non vén máis que a reforzar o noso traballo e o noso compromiso coa igualdade e os colectivos sociais máis desfavorecidos.

O alumnado comezou a traballar, primeiro, timidamente e, logo, con máis desenvoltura. Son uns rapaces e rapazas moi especiais que aproveitarán moitísimo estes obradoiros.

Sexismo, machismo, identidade, roles de xénero… Palabras todas elas que invitan ao debate e á reflexión. E, para finalizar, o resumo da sesión nunha imaxe (coa App Phonto) e unha frase.




Desde a biblioteca escolar intentaremos promover esta actividade de cara ao 25 de novembro, ligándoa ao noso proxecto Bibliomedia: unha invitación á comunicación.

E, para rematar, quero compartir a frase dun alumno: “Debemos ver o mundo cunha mirada crítica”.


Grazas EpDLAB.
Grazas Roi.



xoves, 25 de outubro de 2018

CLUB DE LECTURA "INCLUSIVA"

Este curso comezamos unha nova experiencia que resultou ser do máis interesante e motivadora.

Inauguramos un Club de lectura inclusiva e hoxe foi a presentación. Trátase dun club moi especial. Especial e enriquecedor. O alumnado de 3º PMAR comparte lecturas con mozos e mozas pero, tamén, con persoas máis maiores que teñen en común o gusto polas historias. Historias escritas, historias contadas. 

Persoas do Centro con Eles e rapazada do Centro de Educación Especial visitáronos hoxe para ler e falar do Lazarillo de Tormes. A lectura foi conducida  marabillosamente por Sandra, educadora do Centro con Eles. Houbo participación, risas, sorpresas. Moitos e moitas integrantes do Club leron en voz alta, dun xeito admirable, as aventuras e desventuras do Lazarillo co clérigo. Todo isto, acompañado das personaxes creadas polo alumnado de Sonia Omil, a profe de plástica, e das paisaxes e obxectos elaborados polos outros centros.

Como lección, querer é poder. A lectura compartida non ten fronteiras.






mércores, 24 de outubro de 2018

DÍA DA BIBLIOTECA




Nada mellor para celebrar o Día da Biblioteca que un libro. Libros que transmiten historias a través das palabras, das imaxes, das ilustracións. Libros que, como sinala a novelista británica, Jeanette-Winterson "comunican ideas e forman pontes entre as persoas".







Por iso, o alumnado de Imaxe e Son de 2º de bacharelato quixo achegarnos coas súas fotografías eses momentos lectores. Momentos nos que o libro se converte no principal protagonista.




              

domingo, 14 de outubro de 2018

XA É HORA DE LER ÁS MULLERES!



No III Día das Escritoras e sumándonos á iniciativa da Biblioteca Nacional de España, queremos propoñer a lectura de textos de mulleres Rebeldes e Transgresoras. Un momento de reflexión na Hora de Ler ou en calquera clase ao longo de toda a mañán deste luns 15 de outubro.



En palabras da escritora e xornalista Joana Bonet, comisaria da actividade: "Historiar la rebelión de las mujeres, rendir homenaje a sus protestas escritas, es un modo de recordar que la libertad actual, el lugar que hoy ocupamos en la sociedad, es el resultado de sucesivas rupturas."




"La educación es la llave para tomar decisiones informadas sobre nuestra vida y la única esperanza para el futuro", Isatou Jeng, activista gambiana. 


mércores, 10 de outubro de 2018

DÍA DAS ESCRITORAS

O luns, 15 de novembro conmemórase o III Día das Escritoras, unha iniciativa da Biblioteca Nacional de España, a Federación Española de Mujeres Directivas (FEDEPE) e a Asociación Clásicas y Modernas (CyM). O tema deste ano é Mulleres rebeldes e transgresoras.

As mulleres homenaxeadas son María de Zayas, Juana Manso, Rosalía de Castro,  Rosario de Acuña, Filomena Dato Muruais, Carmen de Burgos, Delmira Agustini, Victoria Ocampo, Aurora Bertrana, Magda Donato, Sorne Unzueta Lanzeta (Utarsus), Ángal Figuera Aymerich, María Zambrano, Idea Vilariño, Ana MAría Matute, Carmen Martín Gaite, Josefina Aldecoa, Alejandra Pizarnik, Esther Tusquets, María -Mercé Marcal e Teresa de Jesús.

Os textos seleccionados pola comisaria da actividade, Joana Bonet, pretenden amosar "la insumisión intelectual de aquellas autoras rebeldes y transgresoras que remaron a contracorriente, y en diferentes épocas y circunstancias cuestionaron el orden que les era impuesto desde la ficción, la poesía o el ensayo."

A Biblioteca do IES Castro Alobre, como moitas outras ao longo da xeografía española, quere sumarse a esta iniciativa e difundir estes textos entre o noso alumnado. Será o luns ao longo de toda a mañán.


domingo, 7 de outubro de 2018

O PREMIO NOBEL DA PAZ 2018, UN MERECIDO RECOÑECEMENTO

Este ano o Premio Nobel da Paz recaiu en dúas persoas que teñen en común a súa loita por acabar coa violación como arma de guerra, Denis Mukwege e Nadia  Murad.

Denis Mukwege é un médico congolés que dirixe o hospital Panzi en Bukavu (República Democrática do Congo). O seu compromiso coas mulleres vítimas de violacións fixérono merecedor deste importante galardón. Xa o Equipo da biblioteca recomendaba o curso pasado, dentro do proxecto Rescatando Culturas, a lectura do artigo Panzi: o lugar onde as mulleres renacen, con motivo da celebración do Día Internacional da Prensa.

Nunha entrevista con Xavier Aldekoa, o doutor Mukwege comentaba: “Estas son violaciones diferentes: usan el cuerpo de la mujer como campo de batalla. La crueldad ejercida resulta inhumana. La violación en una zona de conflicto es la voluntad de destruir al otro y a las generaciones futuras a través de la mujer. Si el mundo comprendiera así la violación, no reaccionaría como si fuera un problema sexual; es una agresión contra la humanidad”.

Foto de Xavier Aldekoa
Podedes ler o perfil do premiado na crónica de Xavier Aldekoa, Doctor Congo (Revista 5W).

Nadia Murad é unha activista iraquí de orixe yazidí que foi torturada e violada por integrantes do Estado Islámico. Ela mesma conta a súa historia no libro Yo seré la última. Historia de mi cautiverio y mi lucha contra el Estado Islámico (Plaza Janés). "He escrito este libro para que queden documentados los crímenes cometidos contra las yazidíes. Para que queden por escrito y en detalle las pruebas de la tragedia y de nuestro genocidio", explica nunha entrevista ao diario El País.

Foto de Patricia Sevilla Ciordia